UMgqithi unxenxa uBroos ayeke ‘ukuba uMamgobhozi’
- Sibongiseni GUMBI
UManqoba Mngqithi uthi umqeqeshi weBafana Bafana uHugo Broos kuzomele afunde ukunaka izindaba zakwakhe, ayeke ezeminye imizi.
Ubekhuluma ephendula inkulumo kaHugo Broos omsole ngokungabadlalisi abadlali abathile kwiMamelodi Sundowns.
UBroos wasola uMngqithi, eveza ukuthi akasiqondi isizathu esingamenza angabadlali oTeboho Mokoena noKhuliso Mudau.
“Kumele alawule ezomuzi wakhe, bese eyeka mina ukuthi ngilawule ezowami,” usho kanje uMngqithi eziphendulela.
“Akekho ozongitshela ukuthi angidlalise bani eqenjini lami. Ngeke ke ngitshelwe omunye umqeqeshi ukuthi ngidlalise bani.
“Iqiniso wukuthi sonke siyalazi izinga lalaba badlali futhi basazosisiza. Asinayo inkinga nabo. Sizilungisile izinkingana ebesinazo nabo,” kuqhuba uMngqithi.
“Kodwa indoda nendoda kumele ibheke ezakwayo. Akekho okhulumayo uma eqala umdlalo ngezitobha eziyisishiyagalombili. Siyathula ngoba siyamhlonipha.
“Ngiyamhlonipha mina, wenzele izwe umsebenzi omuhle. Kodwa kumele kuqondakale ukuthi sinesikwadi esikhulu okumele sisilawule njengoba naye enza kwesakhe.”
UMngqithi uthe ubengakwamukela ukuthi uBroos athinte yena uqobo ukuze bayixoxe njengemadoda eyokuthi kungani bengadlali kwiSundowns laba badlali.
“Into enhle abengayenza wukuthi angishayele ucingo ukuze sixoxe ngalesi simo. Ngeke mina ungizwe ngithi, ‘kungani uqoka lowa mdlali, ungaqoko loyana’.
“Angikulindeleke ukuthi omunye umqeqeshi enze njalo – mhlawumbe sekungaba yizikhulu ezisho lokho.
“Ngenhlonipho enginayo kuye, kumele angifonele bese siyixoxa kahle lento njengabaqeqeshi. Akekho ongaphezu komunye, sonke singabaqeqeshi.”
Kuzobe kubhekwe ngabomvu ukuthi uMngqithi uzobabuyisela yini eqenjini laba badlali emdlalweni olandelayo.
ISundowns izogadulisana neGolden Arrows emdlalweni weCarling Knockout eLucas Moripe Stadium ngoMgqibelo ngo-6 ntambama.
