UMdunyelwa weDowns uvuma isisindo sabalandeli beChiefs
Njengoba iMamelodi Sundowns izovakashela iKaizer Chiefs eFNB Stadium ngoLwesithathu ebusuku, le nkundla izobe igcwele phama.
Amathikithi alo mdlalo angu-60 000 abekhishiwe esigabeni sokuqala adayiswe aphela kusekhona abalandeli abasawafuna.
Lokhu kwenze iChiefs iphinde yengeze amanye angu-15 000 ngaphezulu okusho ukuthi kungase kube nabalandeli abacela ku-75 000 kulo mdlalo.
Isasasa labalandeli beChiefs ngeqembu labo lilandela ukuthi liyiqale ngegiya elihle le sizini – liyinqoba yomithathu imidlalo yeBetway Premiership elisayidlalile.
Lokhu kubeke iChiefs endaweni yesibili, kanti abalandeli abafisi ukuyibona yehla kule ndawo, kunalokho banethemba lokuyibona inyukela kunombolo 1.
Yingakho nomdlali weSundowns, uZuko Mdunyelwa ekuvuma ukuthi kuzoba nesisindo esengeziwe kulo mdlalo ngenxa yabalandeli baMakhosi.
“Ukudlala neKaizer Chiefs akukaze kube lula, ikakhulukazi uma idlalela ekhaya la abalandeli bayo bephuma ngobuningi.
“Akungabazeki ukuthi bazoba neningi labalandeli,” kusho lo mdlali wasemuva kwesokudla ngaphambi kwalo mdlalo.
ISundowns iya kulo mdlalo nje imimoya iphansi. Lokhu kulandela ukuthi omakhelwane beChiefs, i-Orlando Pirates bephinde babukisa ngayo beyiwashisa ijezi kwiMTN8.
“Okuzobaluleka kithi wukuthi singanaki izinto eziningi esezenzekile esikhathini esidlule kodwa sigxile kwesingakwenza ngokuzayo,” kuqhuba uMdunyelwa.
“Sikholwa ukuthi uma singakwazi ukumelana nabazosilethela khona ngoLwesithathu, singaba nethuba lokunqoba.
“Uma abalandeli bethu nabo bengaphuma ngobuningi babe ngumdlali wethu ka-12, baseseke, singakwazi ukuphuma nokuthile ngoba yithi ompetha balesi sicoco.”
FUNDA NALA | OweChiefs uzosebenzisa umdlalo weDowns ukungena kwiBafana
ISundowns isendaweni engayijwayele njengoba ikweyesine ngemuva kokudlala ngokulingana kabili, nokunqoba owodwa emidlalweni esayidlalile.
Leli qembu laseChloorkop livamise ukuthi libe selizihola phambili ngalesi sikhathi sesizini futhi uma iChiefs igazibambanga zaqina, kungalalwa ngoLwesithathu sekunjalo.
Phela uma inqoba iSundonws, bese iSekhukhune nayo yehlulwa kowayo umdlalo, iSundowns izoqhwakela.
