Umbono: Ngabe iFootballer of the Year ikhethwa ngakho?
Umklomelo waminyaka yonke we-PSL Footballer of the Year uhloselwe ukuncoma umdlali ophumelele owenze kahle kuyo yonke imiqhudelwano emine yeligi: okuyiMTN8, iCarling Knockout, iNedbank Cup, Premiership.
Lokhu kuvezwa yiPSL uma abethuli bale miklomelo bechaza ukuthi kuqokwa kanjani kulo mklomelo ongomkhulukazi ebholeni lakuleli.
Nokho, unyaka nonyaka, ukuqokwa nokuhlonzwa konqobile kuqubula inkulumo-mpikiswano.
Lokhu kushiya abaningi bethu bezibuza ukuthi ngabe imibandela yalo mklomelo iyalandelwa ngempela yini.
UKeletso Makgalwa yen’ungene kanjani?Â
Asibuke ukuqokwa kukaKeletso Makgalwa njengesibonelo. Nakuba ukudlala kwakhe kwiSekhukhune United ngokungangabazeki ukuthi bekukuhle, leli qembu lakhe alenzanga kahle emiqhudelwaneni yezinkomishi.
ISekhukhune iphume emzuliswaneni wokuqala kwiMTN8 neCarling Knockout, yaphuma esigabeni se-quarter-final kwiNedbank Cup.
Igcine ithole indawo yesine kwiBetway Premiership – okuyindawo ehloniphekile impela.
Kodwa uma umklomelo uncike ngempela empumelelweni “kuyo yonke imiqhudelwano,” ngabe umdlali iqembu lakhe elingenzanga kahle emiqhudelwaneni emithathu kwemine uyakufanelekela ukuqokwa?
Mina ngibona kudala ukungqubuzana okudidayo nje, sigcine singazi kuqokwa kanjani.
Ukuwina kukaRibeiro: Wenze kahle kwemibili imiqhudelwano
NoLucas Robeiro ogcine eklonyeliswe ngale ndondo ushiye imibuzo. Umgqigqo wakhe ngesizini edlule ubungangabazeki futhi udlale kahle kakhulu.
Kodwa ukuqokwa kwakhe kuyangabazeka uma ubheka imidanbela yalo mklomelo ngeso elingekakwenzelela.
URibeiro ubengumdlali ovelele kwiBetway Premiership, iSundowns eyinqobe ngendlela egculisayo, futhi yafinyelela kowamanqamu kwiCarling Knockout.
Nokho iSundowns ayizange yenze kahle kwiMTN8 nakwiNedbank Cup.
Ngakho-ke, ngenkathi uRibeiro egqamile emiqhudelwaneni emibili emikhulu, ngabe lokhu kuhlanganisa ngempela “yonke” imiqhudelwano ye-PSL?
Uma kungalandelelwa ngokuphelele imibandela, impendulo ingahluka.
UMofokeng: Ngabe uncishiwe lo mklomelo?
Lokhu kusiletha eRelebohile Mofokeng. Amagalelo akhe kwi-Orlando Pirates abebalulekile emikhankasweni emithathu.
Ube nesandla ekunqobeni kwabo iMTN8, wabamba iqhaza elikhulu ekutheni iqembu lifike kowamanqamu kwiNedbank Cup.
Futhi ube nomgqigqo omuhle njengoba esize iPirates iqede edanweni yesibili kwiBetway Premiership.
Lokhu kusho ukuthi uMofokeng uphumelele emiqhudelwaneni emithathu kwemine lo mklomelo ojajwa ngayo.
Ngakho, uma umklomelo ukwazisa ngempela ukusebenza kahle kuyo yonke imiqhudelwano, kungani pho kungabanga uMofokeng onqoba le ndondo?
Akucaciswe, noma ushintshwe igama lo mklomelo
Ukudideka okuqhubekayo kuphakamisa ukungacaci kwemibandela ngokuqokelwa nokunqoba le ndondo.
Mhlawumbe sekuyisikhathi sokuthi i-PSL icubungule kabusha igama lale ndondo noma ishintshe imibandela yawo.
Uma kuwukuthi oyinqobayo ukhethwa abaqeqeshi, awuvele ubizwe ngePSL Coaches’ Player of the Year kube kanye.
Nakhona ke asazi phela ngoba amaqembu ebashintsha kangaka nje abaqeqeshi phakathi nesizini ukuthi kuzomiswa kanjani.
Isibonelo nje, u-Abdeslam Ouaddou ufike isizini isizophela kwiligi yakuleli, ngabe yena uvotele bani? Embone nini edlala?
WINA! GCWALISA IFOMU NGEZANSI UZIWINELE IJEZI LEQEMBU LAKHO
