ULekoelea uncoma ababuyise abalandeli e-Orlando
- Alfred NGUBANE
USteve Lekoelea, oyinkakha ye-Orlando Pirates, usencome abadlali abathathu athi babuyise isithunzi saleli qembu.
Uthi ukugcwala kwenkundla uma iPirates idlala e-Orlando Stadium kungenxa yengcwenga yebhola elidlalwa yibo.
ULekoelea utshele iLisenethini ukuthi oRelibohile Mofokeng, uPatrick “Tito” Maswangayi noThalente Mbatha banesandla ekubuyeni kwabalandeli enkundleni.
“Laba bobathathu badlala ngokuzimisela futhi baliphakamisile izinga, badlalela ibheji ye-Orlando Pirates,” kusho uLekoelea.
“Abalandeli be-Orlando Pirates babuyile ezinkundleni. Lokho kungoba laba badlali benza ezibukwayo.
“Abalandeli baphuma bengawuvali umlomo ngenxa yebhola elidlalwayo.”
ULekoelea, ongomunye wabadlali ababethandwa kakhulu ngabalandeli ngezikhathi zabo, uthi abalandeli bahehwa yizihlabani enkundleni.
Uthi uma kungekho umdlali obachazayo, nodlala ibhola abalithandayo, ngeke bayigcwalise inkundla.
“Uma ngabe ubona abalandeli bebhola bengayi ezinkundleni, ubokwazi ukuthi iqembu alidlali kahle,” kusho uLekoelea.
ULekoelea waqala ukuzakhela igama kwiMoroka Swallows, wabe esedlulela kwi-Orlando Pirates.
Wayenekhono lokushiya izitobha zigaqa noma zibheke phezulu ngomjiko wakhe oya phambilini nokuphasa ibhola ngobungcweti.
Wayengalibheki ipali nangebhola elibekwe phansi endaweni esondelene nepali lezitha.
