UKhune wakhala ubusuku bonke egajwe yiChiefs
- Intatheli yeLISENETHINI
Owayengukaputeni weKaizer Chiefs u-Itumeleng Khune usedalule usizi lwakhe ngemuva kokuthi iqembu limtshele ukuthi akaseyona ingxenye yezinhlelo zalo njengomdlali.
UKhune ubekhuluma esithangamini nabezindaba ngoLwesithathu lapho amenyezelwe khona njengomnikazi wamasheya enkampanini yokubheja iTopBet.
Lo nozinti uveze ukuthi wakhala amasonto amabili ngemuva kokutshelwa ukuthi isikhathi sakhe sokudlala kwiChiefs siphelile.
“Angikwazi ukulawula indlela engizizwa ngayo njalo ekuseni, ngihlale ngivuka ngizizwa ngihlukile,” kusho uKhune.
“Emasontweni ambalwa okuqala ngemva kwemihlangano neqembu, kwakungelula kimi.
“Ngangikhala embhedeni amasonto amabili wonke,” kuqhuba uKhune.
“Ngangingaqondi ukuthi kwenzekani. Khona ngakhonjiswa inhlonipho ngokuthi iqembu lihlale phansi nami lingazise ngohlelo lwalo lokuya phambili.
“Bangazisa ukuthi angiseyona ingxenye yeqembu, angiseyena umdlali…
“Angizange ngikholwe… ngesikhathi ngizwa lezi zindaba. Ngifuna ukudlala isikhathi eside.
“Ngifuna ukudlala ngie ngibe ngale kuka-40, yingakho ngisenethemba kodwa futhi, inhliziyo yami, angikwazi ukuyilawula.
“Nginomuzwa wokuthi ngingabuyela kusasa ngiyodlala, ngakusasa ngivuka nezinhlungu yonke indawo futhi ngicabange ukuthi kulungile, ake ngiyeke.”
UKhune wengeze ngokuthi akakalilahli ithemba lokudlala futhi.
“Uthando lwalo mdlalo lusekhona, ngisangakwazi ukuvimba uma ngibizwa, ngibuke uDennis Onyango, ngimncane kunaye futhi usadlala kwiSundowns,” kusho uKhune.
UKhune uwine izindebe ezingu-12 nenqwaba yemiklomelo kule minyaka engu-25 ekwiChiefs, okuhlanganisa nePremier Soccer League Footballer of the Season ngesizini ka-2012/13.
Lo nozinti oneminyaka engu-37 ubudala ungumdlali wesibili weBafana Bafana odlale imidlalo engu-92.
