Kunconywa uLinda Motlhalo ngokubuyela ‘ekhaya elidala’
Isihlabani seBanyana Banyana uLinda Motlhalo usebuyele eqenjini lakhe lakudala, iGlasgow City, eScotland.
Lesi senzo sakhe sesithole ukunconywa nguFran Hilton Smith owake wacija iBanyana osefundisa abaqeqeshi ngaphansi kweCosafa neCaf.
UMotlhalo ubekezelele isizini engeyinhle e-USA la abedlala khona kwiRacing Louisville kwiNWSL.
Udlale imidlalo emithathu kuphela njengoba isikhathi esiningi ebezithola esebhentshini.
Udlale imidlalo eminingi kwiBanyana Banyana kunaseqenjini lakhe. Akazange asetshenziswe emidlalweni engu-23.
U-Hilton Smith ukholwa ukuthi lokhu kushintha kwakhe kuyisinqumo esihle.
“ULinda ubeba sebhentshini isikhathi esiningi. Akazange adlale kakhulu. Ukubuyela eScotland kuhle kuye.
“Uke wadlala khona phambilini, kuzomsiza ngaphambi kweCaf Women’s Africa Cup of Nations (Wafcon),” kusho uHilton-Smith.
IGlasgow City, engompetha beScottish Women’s League, imemezele ukusayina kwayo uMthlalo ngoLwesihlanu.
Phambilini uMotlhalo udlale imidlalo engu-34 kuleli qembu, washaya amagoli amane walisiza lanqoba isicoco seligi.
Umqeqeshi oyinhloko kueli qembu uLeanne Ross ukwamukele kahle ukubuya kwakhe.
“Ngesikhathi kufika ithuba lokusayinisa kabusha uLinda, kube yisinqumo esilula.
“Uletha ikhwalithi, isipiliyoni, nekhono eliphezulu,” kusho uRoss.
UMotlhalo naye uveze ukujabula kwakhe ngokubuya kwakhe.
“Ngijabule kakhulu ngokubuya. Le ndawo izwakala njengekhaya lesibili.
“Angizange ngicabange kabili ngesikhathi befona,” usho kanje.
