UKhoza uphawula ‘ngomthwalo’ oyisibusiso osehlombe lakhe
- Sibongiseni GUMBI
Usihlalo we-PSL u-Irvin Khoza uthi ukuthenjwa kwakhe ngozakwabo bamaqembu angu-31 e-PSL kuyisibusiso kodwa esiwumthwalo omkhulu.
Amalungu e-PSL anqume ukumgcina uKhoza njengosihlalo eminye iminyaka emine ezayo.
UKhoza uzoqala isikhathi sakhe esisha ngoLwesithathu. Wakhethwa okokuqala ngo-2003, kanti manje useneminyaka engu-21 ehola iPSL.
Ekhuluma kwiPrime Time Sports ku-Ukhozi FM, uthe uwuthathela phezulu lo msebenzi asephinde wanikwa wona.
Umhlangano jikelele we-PSL obanjwa ngemuva kweminyaka emine uzoba ngoLwesithathu eSandton Convention Centre.
Phezulu eqhulwini lalo mhlangano wukuqoka ubuholi obusha obuzosebenzisana noKhoza kule minyaka emine ezayo.
Ngasekuqaleni konyaka, imibiko iveze ukuthi uKhoza, oneminyaka engu-76, ucabanga ukuthatha umhlalaphansi.
Kodwa kuvela ukuthi ngemuva kokuthola ngempumelelo isivumelwano soxhaso lweBetway, uncengiwe ukuthi aqhubeke.
“Kuyisibusiso esikhulu ukuthi amakilabhu angethembe kanje ngoba lokhu kuyinto engavamile ukwenzeka, ikakhulukazi kubantu oncintisana nabo.
“Akuvamisile ukuthi bakwethembe ngamabhizinisi abo kanje,” kusho uKhoza ngoMsombuluko.
“Lokhu ngikuthatha njengomthwalo omkhulu kakhulu ngenhlonipho abanginika yona.
“Angikuthathi kalula lokhu; ngikhohlwe yikilabhu yami (i-Orlando Pirates) yonke le minyaka, ngafaka amandla amaningi kwi-PSL.”
UKhoza nosihlalo weKaizer Chiefs, uKaizer Motaung (80), osebenza futhi njengosihlalo wekomidi lezezimali kwiPSL, yibo bodwa abasekhona, ababakhona kuqokwa okokuqala ikomidi eliphezulu lePSL ngo-1996.
“Ngithanda ukubonga umngani wami omkhulu uKaizer Motaung, obelokhu ekanye nami yonke le minyaka, sisebenza ndawonye ekuthuthukiseni le ligi.
“Besilokhu sigcizelela ukuthi akukhona ngathi kodwa ngeligi.
“Yingakho abaxhasi bakhangeka yi-PSL ngoba bebona ukuthi bathole into yangempela lapho bengatshala khona imali yabo, futhi futhi yonke into ihlanzekile.
“Ngesikhathi ngiqala ukusebenza, imali engenayo yayicishe ibe u-R42 million kuphela, kodwa manje seyicishe ibe ngaphezu kwezigidigidi ngonyaka.
“Lokhu kukhombisa ukuthi sesihambe ibanga elingakanani nale ligi,” kwenzeza uKhoza.
