UDuba udumaze iKruger enyusela iChiefs esicongweni seligi
I-Kaizer Chiefs isinyukele esicongweni seBetway Premiership ngosuku lokuqala lwesizini ngemuva kokunqoba ngo 3-1 ishaya iKruger United.
Lona bekungumdlalo wokuqala kamqeqeshi uFernando da Cruz kanti bewuseMbombela Stadium ngoMgqibelo ebusuku.
Amakhosi aqale umdlalo ngesivinini, kwathi ngomzuzu wesikhombisa uFlavio Da Silva washaya igoli lokuqala.
Yize iChiefs yakhe amanye amathuba okwandisa amagoli, ibukeke yehlisa umdlandla, yanika iKruger United ithuba lokubuyela emdlalweni.
Iqembu lasekhaya libe selibuyela emdlalweni, kwathi ngaphambi nje kwekhefu uKhethukuthula Ndlovu washaya igoli elihle, kwaba ngu 1-1.
Esigabeni sesibili, izinguquko zikaDa Cruz zibe nomthelela omkhulu.
UWandile Duba, ongene esuka ebhentshini, ubuyisele i-Kaizer Chiefs phambili ngemuva kokugxumela ibhola eliphunyuke kunozinti weKruger United.
Lo mgadli osemncane uphinde washaya igoli lesithathu ngomzuzu ka-66, waqedela amagoli akhe amabili futhi waqinisekisa ukunqoba kweChiefs ngo 3-1.
Yize womabili amaqembu eqhubekile nokufuna amanye amagoli, awekho aphinde atholakala kwaze kwaphela umdlalo.
- FUNDA NALA | ElePSL lihlola umdlali waseBrazil
Lokhu kunqoba kunyusele i-Kaizer Chiefs esicongweni seBetway Premiership ngomehluko wamagoli, idlula izimbangi zayo zaseSoweto, i-Orlando Pirates, nayo eqale isizini ngokunqoba.
- EZISHISAYO|Â Cofa lapha usithole kuWhatsApp
