UDa Gama usola iMagesi ngokushweba umsebenzi weDurban City
Umakadebona womqeqeshi u-Owen Da Gama ukuqinisekisile ukuthi bezikhona izingxoxo namaqembu athile eBetway Premiership kulandela ukushiya kwakhe kwi-Magesi FC.
Nokho uyavuma ukuthi isikhathi ashiye ngaso kuleli qembu laseLimpopo kumphuthisele ngamanye amathuba.
UDa Gama umangaze abaningi ngokuhlukana naleli qembu ngemuva kokwenza kahle kulo, elihlenga ezembeni.
Bekubhekwe ukuthi athathe izintambo kwiDurban City — esanda kungena kwiBetway Premiership.
Kodwa-ke, le kilabhu ikhethe uGavin Hunt, okushiye uDa Gama engenamsebenzi njengoba kusondela isizini entsha.
“Bekukhona abantu abebengikhulumela, kodwa angizange mina ngokwami ngikhulume namuntu,” uDa Gama ucashunwe esho kanje kwiFARPost.
“Amakilabhu enza izinqumo ezihambisana nawo. Lokho kuyinto efanele, ibhola lisebenza kanjalo nje.”
U-Owen Da Gama uvumile ukuthi ukubambezeleka kokushiya kwakhe kwi-Magesi kube nomthelela omubi.
“Ukube ngangaze ekupheleni kwesizini ukuthi ngeke ngibe yingxenye yeqembu, nginesiqiniseko sokuthi kukhona okunye obekuzovela.
“Ngeshwa, ngesikhathi ngishiya, amakilabhu amaningi abesevele ezenzile izinqumo ngabaqeqeshi bawo.”
Naphezu kokuphoxeka, u-Owen Da Gama – ongumqeqeshi onamava futhi osesebenze emaqenjini ehlukene – usenethemba.
“Konke kusezandleni zikaNkulunkulu. Angazi ukuthi kuzokwenzeka maduze noma kudala kangakanani, kodwa nginethemba lokuthi kuzokwenzeka okuthile okuhle.”
Lo somaqhinga oneminyaka engu-62 ubudala uphinde waveza ukuthi usanda kuchitha isikhathi eSpain, lapho ekhuphule khona izincwadi zakhe zokuqeqesha.
Lokhu kungolunye uphawu lokuthi uzigcina ebukhali ngesikhathi elinde ithuba elifanele.
Ngolwazi lwakhe, u-Owen Da Gama akungabazeki ukuthi uzohlezi esemiqondweni emaqenjini uma esefuna ukwenza izinguquko kubaqeqeshi maphakathi nesizini.
