UComitis uvulela olaxazwe yiPirates umnyango kwiCity
– Intatheli yeLisenethini
Lowo obengumgadli we-Orlando Pirates, uKermit Erasmus, usehehe intshisekelo yeqembu elidlala kwiDStv Premiership.
Lokhu kulandela ukukhululwa kwakhe yiPirates ekupheleni kwesizini edlule.
Usihlalo weCape Town City, uJohn Comitis, useqinisekise izingxoxo eziqhubekayo no-Erasmus mayelana nokubuyela eqenjini.
U-Erasmus, ongomunye wabadlali abayisithupha abadedelwe yiPirates, unomlando kwiCape Town City.
Wake wadlala kuleli qembu futhi waba nempumelelo enhle futhi kulapho ashaya khona amagoli ngendlela encomekayo.
UComitis ugqamise umthelela okungenzeka u-Erasmus abe nawo eqenjini, uma kwenzeka egcine esayiniwe.
“Sengike ngakhuluma noKermit, kodwa kuzoncika ekutheni siyamdiinga yini ngoba siseno(Khanyisa) Mayo,” kusho uComitis kuleli sonto.
“Akazange adlale kakhulu kwiPirates, kodwa uyasebenza kakhulu. Akadingi imizuzu eminingi ukukukhombisa ukuthi uyakwazi ukushaya amagoli.
“Uma engakwazi ukugwema ukulimala, kuningi asangakwenza ebholeni.”
Isikhathi esincane sokudlala sika-Erasmus kwiPirates ngesizini edlule asimthenanga amandla uComitis, osanethemba ngamagalelo alo mdlali.
OLUNYE UDABA: UBarlett uxolela uKaizer Motaung ngabaqeqeshi bakuleli
Uyaziwa ngekhono lakhe nesipiliyoni, u-Erasmus angase anikeze umfutho obonakalayo ekuhlaseleni kweCape Town City uma kwenzeka esayina.
