UBroos uveza ‘imfihlo’ ayihlebela uMofokeng nge-Europe
Umqeqeshi weBafana Bafana uHugo Broos useveze iseluleko asinika uRelebohile Mofokeng njengoba emataniswa namaqembu ase-Europe.
UMofokeng, oneminyaka engu-20 ubudala, uhehe amaqembu okukhona kuwo iBarcelona B neziqhwaga zaseScotland iRangers.
Kubikwa ukuthi i-Orlando Pirates yasichitha isicelo esifike ngoJanuwari seZamalek yase-Egypt sokudayiselwa lo mdlali.
UBroos, nokho, unxuse lo mdlali osemncane ukuthi akhethe ngobuhlakani iqembu elilandelayo azoya kulo.
“Ngamtshela zisuka nje… Ngathi, ‘Hlala omunye unyaka lapha. Dlala kwiChampions League nePirates’.
“‘Thola ulwazi kwiPSL’. Ngathi kuseva kakhulu kuwe ukuthi usungashiya kuleli,” kusho uBroos kwi-iDiski Times.
Lo mqeqeshi waseBelgium ukholwa ukuthi uMofokeng wenze isinqumo esifanele ngokuhlala kwiPirates okwamanje.
Nokho, kumele acabange ngokucophelela uma esefuna ukuthatha isinyathelo esilandelayo emsebenzini wakhe.
“Uma efuna iBarcelona, angahamba eminyakeni emibili noma emithathu ezayo. Ngaleso sikhathi, uzobe eseqine ngokwenele,” kwengeza uBroos.
UBroos uphinde waxwayisa ngomehluko phakathi kwebhola laseNingizimu Afrika nelase-Europe.
“ENingizimu Afrika, wonke umuntu uyamazi. KwiBarcelona, uzoba omunye nje umdlali,” kucacisa uBroos.
Uphinde wawuchitha umqondo wokufudukela eScotland, wathi iligi yakhona ayinamandla kangako futhi ngeke imkhulise.
“IRangers? Uzokwenzani lapho? Kudlalwa uqinathambo, ibhola lihanjiswa emoyeni, futhi bazomchoboza. Ngeke adlale lapho,” kuqhuba lo mqeqeshi.
Lo mqeqeshi ugcizelela ukuthi uMofokeng kufanele akhethe ikilabhu evumelana nendlela yakhe yokudlala futhi azonikwa kuyo ithuba lokudlala.
