UMbatha uveza isifiso sakhe ebuyela ekudlaleni kwiPirates
Umdlali wasesiswini we-Orlando Pirates, u-Thalente Mbatha, usekulungele ukubuyela enkundleni njengoba eselulame ekulimaleni okumbeke ngaphandle ekuqaleni kwesizini.
UMbatha usebuyele ekuzilolongeni neqembu ngokugcwele futhi usedlale nemidlalo yokulungiselela ukuze abuyise ukuqina nokuzethemba ngaphambi kowamanqamu weMTN8.
IPirates izokwamukela iMamelodi Sundowns kowamanqamu eMoses Mabhida Stadium ngoMgqibelo ngo-6 ntambama.
Lo mdlali uyavuma ukuthi ukubuyela enkundleni bekungeyona into elula.
“Kube wuhambo olunzima ukubuyela enkundleni,” kuvuma yena kuleli sonto.
“Kodwa umnyango wezokwelapha ungisizile futhi usaqhubeka nokungisiza ngoba kumele ngiqhubeke nokuzilolonga ukuze ngiqine.”
UMbatha uthi imidlalo yokulungiselela imsize kakhulu ekubuyiseni ukuqina komzimba nokuzethemba.
Kungenzeka abhekane noTeboho Mokoena, asebenza naye kwiBafana Bafana, uma ethola ithuba lokudlala kowamanqamu. Nokho, uthi akagxilile kubadlali beSundowns.
“Angigxili ezimbangini. Ngigxile emsebenzini wami kwi-Orlando Pirates,” kuqhuba u-Thalente Mbatha.
“Uma nginikezwa ithuba kowamanqamu, ngizokwenza konke okusemandleni ami ukusiza iqembu ukuthi linqobe enye indebe.”
IPirates izobhekana neSundowns eMoses Mabhida Stadium, ifuna ukunqoba iMTN8 okwesihlanu emlandweni wayo.
- FUNDA NALA | Okusha ngecala likaMogaila
ISundowns yona ibheke ukunqoba indebe yayo yokuqala ngaphansi kukaMiguel Cardoso.
Isinqobe iligi neCaf Champions League. Ukubuya kuka-Thalente Mbatha kuzoyiqinisa kakhulu i-Orlando Pirates ngenxa yamava akhe.
- EZISHISAYO| Cofa lapha usithole kuWhatsApp
