UShabalala nesikhalo kwiChiefs ngokuqinisa iqembu
Ingwazi ye-Kaizer Chiefs, u-Siphiwe “Shabba” Tshabalala, isikhiphe isicelo esibheke kubaphathi ngokuqiniswa kweqembu.
Unxuse abaphathi beqembu ukuthi baqhubeke nokusayina abadlali ngaphambi kokuvalwa kwewindi lokuhwebelana, wathi iqembu lisadinga ukujula ukuze likwazi ukubanga izicoco.
IChiefs izoqala isizini yeBetway Premiership ka-2026/27 ngomdlalo neKruger United ngoMgqibelo.
Izophinde idlale kwiCaf Confederation Cup, iMTN8, iCarling Knockout neNedbank Cup.
Yize iChiefs isisayine uThabo Moloisane, uRenaldo Leaner, u-Adolf Mtasingwa Bitegeko futhi kubikwa ukuthi isiqedile ngoLangelihle Phili, uShabba uthi kusamele kufike abanye abadlali.
“Ngicabanga ukuthi kusekhona abadlali okufanele basayinwe,” kusho uTshabalala.
“Nginesiqiniseko sokuthi iqembu lifuna ukuletha abadlali abasezingeni eliphezulu.
“Udinga iqembu elijulile ukuze ukwazi ukuncintisana. Amaqembu anqoba izicoco anabadlali abasezingeni kuzo zonke izindawo.”
Uthe iqembu eliphumelelayo alinciki kubadlali abambalwa kuphela.
“Kumele uncike eqenjini lonke. Ngisho nabadlali abasuka ebhentshini kumele bakwazi ukungena benze umehluko.”
U-Siphiwe Tshabalala uphinde wancoma uThabo Moloisane, ethi ungumdlali wasemuva osezingeni elifanele ukudlalela i-Kaizer Chiefs.
- FUNDA NALA | ISafa iphawula ngoMbane ‘othuke’ abalandeli
Uncome nonozinti uRenaldo Leaner, ethi unekhono lokudlala emidlalweni emikhulu futhi uzokwakha umncintiswano onempilo noBrandon Petersen.
Ngo-Adolf Mtasingwa Bitegeko, uShabba uthe akakamuboni edlala, kodwa umfisela okuhle.
- EZISHISAYO| Cofa lapha usithole kuWhatsApp
