UMokwena nesithembiso esinqala kwiWydad ngekusasa
Umqeqeshi we-Wydad Athletic, uRulani Mokwena usethathe isinqumo esikhulu nesimangazayo ngekusasa lakhe kuleli qembu.
Lo mqeqeshi ongowokuzalwa eNingizimu Afrika ungaphansi kwengcindezi enkulu njengoba leli qembu selidlale imidlalo emine lihluleka ukunqoba.
Le miphumela engemihle yakamuva ibeke ikilabhu engcupheni yokuphuthelwa yizindawo zokubuyela kwiCaf Champions League unyaka wesibili kulandelana.
URulani Mokwena ulandwe ukuzoshintsha izinto ngemuva kokuthi i-Wydad ingene ehlazweni ngokuqeda endaweni yesikhombisa ngesizini edlule.
Yize kube nokuthuthuka mayelana nokuthi i-Wydad ikuphi njengamanje ngokwezinga, kukhona ukungajabuli mayelana nenqubekela phambili.
Abalandeli sebevele bake baphumela obala bakhombisa ukungeneliseki kwabo emidlalweni edlule ngokujikijela iqembu ngezibi.
URulani Mokwena uzigxekile lezi zigameko esidlangalaleni zabalandeli be-Wydad, wathi abalandeli abanabo ubulungiswa kubadlali bakhe abazama konke okusemandleni abo.
Ukungatholi imiphumela elindelwe, naphezu kwezinguquko eziningi ezinhle ezibonalayo, sekufake uRulani Mokwena ingcindezi futhi kunokuqagela okushubile ngekusasa lakhe.
Futhi ngokusho kwewbhusayithi yaseMorocco, iKoora, usethathe isinqumo ngekusasa lakhe futhi wazazisa nezikhulu zekilabhu ngaso.
Umbiko uveza ukuthi uRulani Mokwena uzibophezele ekusizeni i-Wydad iqede endaweni yesibili kwiBotola Pro League kule sizini.
Futhi uma ehluleka ukufeza lokho, uzozishiyela yena ngokukhululeka nangenhliziyo emhlophe kulezi zinkunzi zaseMorocco.
“Uma nginesiqiniseko sokuthi yicebo lami eliyimbangela (yokwehluleka), noma ukuthi yimi imbangela, ngizobuyela ezweni lami ngokushesha.
“Ngiyayithanda le kilabhu futhi ngizama konke okusemandleni ami ukuyisiza ithuthuke,” kuthiw aubhale kanje uMokwena encwadini ayibhekise kubaphathi beqembu.
“Sibhekene nesimo esinzima futhi kufanele sonke sisebenzisane ukusilungisa lesi simo.
“I-Wydad izokulwela ukuthola indawo yesibili kuze kube umzuliswano wokugcina futhi kufanele silwe kuze kube sekupheleni ukuze sikufeze lokho.”
