UBroos ucacisa ngekusasa lakhe kwiBafana Bafana

Umqeqeshi weBafana Bafana, uHugo Broos, useqinisekisile ukuthi uzowushiya umsebenzi wokuqeqesha iqembu lesizwe laseNingizimu Afrika ngemuva kweminyaka emihlanu egcwele impumelelo.

Lo mqeqeshi waseBelgium oneminyaka engu-74 uveze lesi sinqumo engxoxweni abe nayo nephephandaba laseBelgium, iVoetbalnieuws, lapho ethe isikhathi sakhe neBafana sesiphelile.

UBroos ushiya iBafana njengomqeqeshi osehlale isikhathi eside kunabo bonke emlandweni weqembu. 

Waqashwa ngoJuni ka-2021, waqala umsebenzi wokwakha iqembu elaqhubeka laba ngelinye lamaqembu aqinile e-Afrika.

Impumelelo yakhe enkulu kube ukuhola iBafana yafinyelela emzuliswaneni womkhumulajezi kwiNdebe yoMhlaba okokuqala emlandweni webhola laseNingizimu Afrika.

Ngaphandle kwalokho, u-Hugo Broos uhole i-Bafana Bafana ukuthi ifinyelele kabili kulandelana kwi-Africa Cup of Nations, yaphinde yawina indondo yethusi emqhudelwaneni ka-2023 owawubanjelwe e-Ivory Coast.

• FUNDA NALA | ISekhukhune isidedele abanye abathathu

Ukuhamba kukaBroos kusho ukuthi iSafa kuzomele isheshe iqede uhlelo lokuqasha umqeqeshi omusha ngaphambi kokuthi kuqale imidlalo yokuhlungela i-Afcon ka-2027 ngoMandulo.

UNgqongqoshe wezemidlalo, uGayton McKenzie, useke waveza ukuthi ufuna uPitso Mosimane kube nguyena ozothatha izintambo ku-Hugo Broos kwi-Bafana Bafana.

• EZISHISAYO| Cofa lapha usithole kuWhatsApp