U-Aden McCarthy uhloniphe umngani edlala okokuqala kwiChiefs
Umdlalo wokuqala ka-Aden McCarthy kwiKaizer Chiefs ngoMgqibelo bewungaphezulu komdlalo nje kuye.
Hhayi ngoba ubedlala okokuqala, kodwa bekuwungowokuhlonipha kumngane ongasekho.
Lo mdlali wasemuva oneminyaka engu-21 ubudala udlale umdlalo wakhe wokuqala kuMakhosi ngesikhathi bebambana ngo 1-1 neSekhukhune United.
U-Aden McCarthy, owayindodana kaFabian McCarthy naye owadlala kwiKaizer Chiefs, udlale imizuzu engu-86 kulo mdlalo weBetway Premiership.
Ube esephunyuzwa njengoba ebebonakala esebanjwa amajaqamba, kwangena uNjabulo Blom endaweni yakhe.
Kodwa kuye ukudlala kwakhe bekungaphezulu kokuba senkundleni asize iqembu, kodwa bekunomuzwa ojulile.
Uhloniphe ngawo umngani wakhe ongasekho uLuke Fleurs, abebenaye kwiChiefs ngesizini edlule.
UFleurs wafa kabuhlungu ngokudutshulwa ngesikhathi edunwa imoto ngo-Ephreli 2024 eGoli.
UFleurs obengumdlali wasemuva othembisayo ngokwakhe. Wasala khona endaweni yesigameko.
Kuboshwe abasolwa abayisithupha ngokubulawa kwakhe, kanti icala lisesezinkantolo.
U-Aden McCarthy ubambe elikhulu iqhaza ekusizeni iqembu lenkulisa leKaizer Chiefs ukuthi linqobe isicoco seDStv Diski Challenge kule sizini.
Uphinde wahlaba umxhwele nasebholeni lamazwe ngamazwe. Udlale kahle eqenjini lesizwe linqoba iMalawi ngo 2-1 sekuhlanganiswe imiphumela kweyokuhlungela iChan.
Lokhu kuwina kusize iBafana Bafana yathola indawo emqhudelwaneni weChan ka-2025 ozoba seKenya, Uganda naseTanzania.
Ebhala kwi-Instagram ngemuva komdlalo wangoMgqibelo ePeter Mokaba Stadium, u-Aden McCarthy uhloniphe uFleurs.
“Ngidlale eqenjini elikhulu okokuqala – ngiyabonga, Nkosi. Kube wuhambo olufakazelwe wumbhalo okuJohn 13:7 (eBhayibhelini) futhi lesi yisiqalo… Lokhu ngikwenzele uLuka Fleurs.”
Ukudlala kahle kukaMcCarthy nokuhlonipha umngani wakhe kumenze wanconywa abalandeli nozakwabo ngokufanayo.
Manje usezoba nethemba lokuthi uzophinde angene eqenjini uma iKaizer Chiefs isidlala umdlalo wokugcina kule sizini nePolokwane City eFNB Stadium ngoMgqibelo.
