Sezigawulwe zabekwa ‘kowegqubu’ weDurban City neChippa
IDurban City isheshe yalithola ithuba lokubuyisa izinduku zishisa kwiChippa United ebukise ngayo emdlalweni weligi ngempelasonto edlule.
IChippa ishaye iDurban City ngo 2-0 ngakubo eBuffalo City Stadium kanti lamaqembu azophinde avovane inkani ngoLwesihlanu ebusuku.
Kulokhu azogadulisana emdlalweni weNedbank Cup eChatsworth Stadium – lo mdlalo uqala ngo-7 ebusuku.
Kuyacaca ke ukuthi ngumdlalo wegqubu ngezizathu ezimbili – esekuthi iCity ishayiwe kodlule, nokuthi iqeqeshwa nguSinethemba Badela oxoshiwe kwiChippa.
Lo mqeqeshi osemncane ubeqale isizini kwiChippa kodwa waxoshwa kungakapheli sikhathi esitheni.
Ngokwemvelo, cishe awukho umdlalo angajabulela ukuwunqoba ukwedlula lona – abhulise leli qembu elimhlambalazile amazolo.
WOmabili amaqembu asewakhiphile azoqala ngawo lo mdlalo obalulekile nozokhipha iqembu lesithathu ukudlulela phambili kulo mqhudelwano.
IMamelodi Sundonws – ekhiphe iGomora United – neStellenbosch FC – ekhiphe iKaizer Chiefs – sebevele balinde emzuliswaneni wesibili.
- Ibophele kanje iDurban City: Keet – Ncanana, Mashego, De Kock, Gcaba – Pogenpoel, Jurgens, Nodada – Magawana, Maseko, Koapeng
- IChippa yona ibophele kanje: Msibi – Majadibodu, Modise, Mobara Modingwana – Kammies, Figareido, Konqoba, Mosele – Kwayiba, Matrose
