Sesiphumile isinqumo sawePSL ngeRoyal AM

IPremier Soccer League (PSL) isibunqamule ngokusemthethweni ubulungu be-Royal AM. 

Lokhu kulandela ukuvumelana ngazwi linye kwamalungu ebhodi elengamele i-PSL ngoLwesine ekuseni.

Umhlangano, obubanjelwe eSandton Convention Centre, ubuhlanganise abamele wonke amakilabhu angu-31 ePSL — ngaphandle kwe-Royal AM. 

Lesi sinqumo seseke isiphakamiso esenziwe yisigungu esiphezulu sale nhlangano, esiholwa ngu-Irvin Khoza.

IRoyal AM ibilokhu isenkingeni kusukela kuqale unyaka. Leli qembu lihlulekile ukuqhubeka nemidlalo yalo kusukela ngoJanuwari. 

Lokhu kuholele ekumisweni kwalo unomphela kwiBetway Premiership, lachithwa nakwiNedbank Cup.

Le kilabhu igcine isifakwa ngaphansi komengameli oqokwe yiSars, yafakwa nasendalini. 

Isizathu? Isikweletu sentela sika-R40 million sikamengameli wekilabhu uShauwn Mkhize nomndeni wakhe.

I-PSL ibe seyinquma ukuthi le kilabhu ivele ikhishwe ezigabeni zayo, okusho ukuthi ayidliwa nayizembe ukuthi yehlele kwiMotsepe Foundation Championship. 

Njengoba iRoyal AM ibisadlale imidlalo engu-11 kuphela kule sizini, yonke imiphumela ethinta le kilabhu icishiwe. 

Amaphuzu atholwe amaqembu ebhekene neRoyal AM acishiwe – kufana nokuthi iRoyal AM ayikaze yaba khona kule sizini. 

Lokhu kuzoba nomthelela omkhulu kwilogi. Wonke amaqembu asele azoqeda umkhankaso weligi emidlalweni engu-28. 

Ukuxoshwa kweRoyal AM kusho ukuthi iqembu elizoqeda lisendaweni ka-15 lizoyodlala imidlalo yokuhlunga. 

• FUNDA NALA | UWandile Duba usebheke ukuthoba izinhliziyo zabeChiefs

I-PSL ayikaphawuli ngokuthi kusho ukuthini lokhu ngekusasa leRoyal AM noma ezinye izinyathelo zomthetho. 

• SIBAMBE NAKU-FACEBOOK | Lisenethini.co.za

Okwamanje, isinqumo simile: IRoyal AM isiphumile ngokusemthethweni kwiPSL.