Sekuqhume ‘is’Chippa’ nakuVusumuzi Vilakazi
IChippa United kubikwa ukuthi isihlukene nomqeqeshi uVusumuzi Vilakazi ngemuva kwamahora ambalwa ehlulwe kanzima yiSekhukhune United.
Leli qembu elizinze e-Eastern Cape lishaywe ngo 3-2 yiSekhukhune emdlweni weBetway Premiership ngoLwesithathu emini.
Ukuhlulwa kwakamuva kubukeka sengathi kube yisici sokugcina esicike abaphathi, babe sebebugqashula ubudlelwano.
Lo mphumela usondeze iChippa United ezembeni njengoba isendaweni ka-13 ngamaphuzu angu-24 emidlalweni engu-27.
Ngokubika kwe-iDiski Times, uVusumuzi Vilakazi — owaziwa ngelikaKanu ebholeni — usewazisile amalungu ethimba lakhe nabadlali ukuthi uyalishiya iqembu ngokushesha.
Lesi sinqumo siza ngemuva kokuthi iChippa ihlulwe kanzima kulandelana, okuhlanganisa nokushaywa kabuhlungu AmaZulu FC ngo 5-1 ngempelasonto edlule.
Ukuhamba kukaVusumuzi Vilakazi kulandela imiphumela engemihle la iChippa inobe umdlalo owodwa kweyisishiyagalolunye edlule.
Uhamba nje ubengumqeqeshi wesine ukuhola leli qembu kule sizini elandela uSinethemba Badela, uMusa Nyatama noLuc Eymael.
IChippa isele nemidlalo emithathu – la izobhekana khona neTS Galaxy, iGolden Arrows neKaizer Chiefs.
Njengoba izembe seliyibukela emakhaleni nje, le kilabhu ibhekene nempi enkulu yokugcina indawo yayo kwiBetway Premiership.
