Sebeyisithupha ‘abasayinwe’ yi-Orlando Pirates
Abalandeli be-Orlando Pirates kungase kudingeke balinde isikhashana ngaphambi kokuthi babone omunye wabadlali abasha abasayinisiwe egqoke ijezi lale kilabhu.
Umdlali wasesiswini, uKabelo Kgositsile ungomunye wabadlali okubikwa ukuthi basayinwe yi-Orlando Pirates ukulungiselela isizini ezayo.
Yena noTshepo Mashiloane bazobe besemabhukwini amaBhakabhaka odumo ngesizini ezayo ngemuva kokusayinwa kwiBaroka FC.
UKgositsile ukuqinisekisile ukuthi uzoya kwiPirates emasontweni ambalwa edlule kuFacebook.
Lo mfanyana osemncane wabhala ebalisa ngokuthi ngeke alithole ithuba lokudlala ngaphansi kukaJose Riveiro.
Manje lo mdlali oneminyaka engu-20 ubudala usekuqinisekisile ukuthi ngeke esadlala kwiPirates ngesizini ezayo njengoba ezobolekiswa.
“Kubukeka sengathi ngizochitha enye isizini kwiBaroka njengoba ngizwa kuthiwa iPirates ifuna ukungibolekisa,” kubhala uKgositsile kuFacebook kuleli sonto.
Nokho ngokuhamba kwesikhathi ubuye wawususa lo mbhalo wakhe.
Imibiko yakamuva iveza ukuthi i-Orlando Pirates inomuzwa wokuthi usadinga enye isizini kwiBakgaga ukuze athole amava.
Khonamanjalo i-Orlando Pirates kubikwa ukuthi isivele isayinise abadlali abasha abayisithupha njengoba isaqhubeka nokuqinisa isikwati sayo.
Laba badlali abayisithupha yilaba:
UTshepo Mashiloane, oneminyaka engu-23 ubudala kwesokunxele emuva kuBaroka
UMasindi Nemtajela oneminyaka engu-23 ubudala owine iMarumo Gallants
UNkosikhona Ndaba oneminyaka engu-22 ubudala kwesokunxele emuva eRichards Bay
USinoxolo Kwayiba oneminyaka engu-25 ubudala waseChippa United
USihle Nduli umdlali wasesiswini oneminyaka engu-29 ubudala waseStellenbosch FC
UKabelo Kgositsile oneminyaka engu-20 ubudala waseBaroka FC
Bangase babe baningi abanye abadlali abazosayiswa ikakhulukazi kubagadli.
Abadlali ababili sebekhululiwe okungukakaputeni u-Innocent Maela nojenene wasesiswini uMiguel Timm.
UMaela kulindeleke ukuthi athathe omunye umsebenzi kuyo i-Orlando Pirtaes kanti uTimm yena kubikwa ukuthi uya kwiSekhukhune United.
Abanye abadlali abambalwa kulindeleke ukuthi bakhululwe noma kubolekiswe ngabo ukuze iqembu lingagcini linabadlali abaningi kakhulu.
Kodwa ezinye zalezo zinqumo zingase zibambezeleke kuze kuqokwe umqeqeshi omusha ozovala isikhala sikaJose Riveiro.
Lowo mqeqeshi omusha kuzofanele abe nezwi ekutheni ngobani abahambayo nokuthi obani abahlalayo.
