OweRoyal AM uthi ‘liphume nobomvu’ kushiya umdlali
Imenenja yeRoyal AM, uRichards Makhoba, isidalule isizathu sokuthi bavume ukukhulula omunye wabagadli babo.
UMxolisi Macuphu ushiye leli qembu leBetway Premiership elinezinkinga ezingapheli ngesonto eledlule.
Ekhuluma neSABC Sport, uMakhoba uthe yiminyaka kaMacuphu nokungabi namthelela obonakalayo eqenjini okwenze kube lula ukuthi bamkhulule.
“UMacuphu ukhishwe ngenxa yokungenzi kahle nobudala,” kuchaza uMakhoba.
“Ubefuna iqembu lapho azodlala khona njalo, samvumela ke thina.”
UMakhoba ukuchithile ukukhathazeka ngokushoda kwabadlali kwiRoyal AM.
Uthi iqembu selikulungele ukuqhubeka nomkhankaso walo weBetway Premiership.
Ngokusho kwakhe, leli qembu linabadlali abangu-37 ababhalisiwe kwiPSL kanti lizobhekana ne-Orlando Pirates ekhaya ngoLwesine.
Umdlalo wokugcina weRoyal AM wawungoDisemba 29 ibhekene neTS Galaxy.
Baphuthelwe umdlalo wabo neChippa United ngemuva kokuthi abadlali bedube ukuzilolonga ngenxa yokungaholi.
Lokhu kwakudalwe wukuthi iSouth African Revenue Service (Sars) ifake le kilabhu ngaphansi komlawuli ngenxa yesikweletu sika-R40 million.
UMakhoba uthe abadlali sebebuyele ejimini ngemuva kokuthola amaholo abo kaDisemba.
Umdlalo nePirates oseeHarry Gwala Stadium uhlelelwe uLwesine ebusuku.
“Sesilungile,” kusho uMakhoba. “Sineqembu labadlali abangu-37.”
“Isigwebo seFifa asisithikamezi kangako,” kusho lesi sikhulu.
“Iqembu lethu linokujula okumangalisayo, sinabagadli abangaphezu kwabahlanu abasefomini ephezulu.”
Unxuse abalandeli ukuthi baleseke iqembu njengoba seliqhubeka nomsebenzi.
“Umdlalo wePirates uvusa usinga nje ngokwawo. Benze kahle kwiCaf Champions League, futhi sesikulungele ukubhekana nabo.”
