Owe-DDC uzovala isizungu semidlalo yePSL
Kuqhathwe omkhaya emidlalweni yeDStv Diski Challenge kule mpelasonto, kanti osuthathe amehlo ngowezinkunzi zaseSoweto.
Amaqembu ezinkulisa ze-Orlando Pirates neKaizer Chiefs azogadulisana emdlalweni walesi sigaba ePetrus Malemela Stadium, eBloemfontein.
Lo mdlalo uzoba ngeSonto kanti uzoqala ngo 3 ntambama. IChiefs isethubeni lokugxuma yeqe iStellenbosch iqhwakele kule ligi uma inqoba.
Amakhosi amancane asendaweni yesibili ngamaphuzu angu-48 ngemuva kwemidlalo engu-20.
Asethubeni elihle ke njengoba esalele emuva ngemidlalo emibili kwiStellies esakaze iMarumo Gallants ngo 9-1 ngoMgqibelo.
IChiefs izobe ingahlomile ngokuphelele kulo mdlalo njengoba iningana labadlali bayo esekhempini yeqembu lesizwe lika-Under 20.
IPirates, ecijwa yinkakha yeqembu uJoseph “Duku-Duku” Makhanya, isendaweni yesine kanti inamaphuzu angu-43.
Uma yona inqoba izonyuka ngendawo eyodwa iye kweyesithathu ngemuva kweChiefs neStellies.
Yize kungumdlalo wamaqembu ezinkulisa, usuvele ubhekwe ngabomvu kanti nenkundla kubhekwe igcwale ikakhulukazi njengoba kungenzwa mahhala.
