Owayeyisikhulu selePSL kwabafuna iRoyal AM
Owayeyisikhulu sezokuxhumana kwiSuperSport United oseyiLungu lePhalamende elimele i-MK Party uDavid “Mazolman” Skosana usengenele umjaho wokuthenga i-Royal AM.
USkosan, ehambisnaa nosomabhizinisi uJoe “Ferrari” Sibanyoni sebefake isicelo sokuthenga le kilabhu efakwe endalini ngumqoqi wentela kuleli, iSars.
Umfelandawonye wabo ubeke etafuleni u-R15 million ukuthi uthathe izintambo kuleli qembu elidonsa kanzima.
I-Royal AM imiswe yiPSL ngemuva kokwehluleka ukuhlonipha imidlalo yayo.
Le kilabhu ibhekene nesikweletu sentela sika-R40 million esikweletwa ngumnikazi wayo uShauwn “MaMkhize” Mkhize.
ISars isilifake endalini ngemvume yenkantolo, ukuze ikwazi ukuqoqa le mali ekweletwa yona.
Uma bephumelele oSkosana noSibanyoni, bahlela ukuyithuthela KwaNdebele, eMpumalanga, ikilabhu ngesizini ka-2025/2026.
USkosana, unamava amaningi ebholeni lakuleli njengoba asebenza ezinkhundleni ezehlukene kwiSuperSport United iminyaka engaphezu kwengu-20 ngaphambi kokungena kwezamabhizinisi.
- SILANDELE KU-FACEBOOK | Cofa la, Lisenethini.co.za
Ubambe elikhulu iqhaza empumelelweni yeSuperSport United ngaphansi kwabaqeqeshi uPitso Mosimane noGavin Hunt.
Ngokubika kweSunday World, isiphakamiso sale nkampani yabo sithi inhloso yabo ukugcina ikilabhu idlala kwi-PSL.
Bafuna nokugcina izisebenzi, zingalahlekelwa yimisebenzi yazo, okuhlanganisa abadlali, abasebenzi basehhovisi nabaphathi.
Baphinde bahlose ukufaka uhlelo lokuphathwa kwekilabhu okusezingeni eliphezulu futhi iphathiswe okwebhizinisi.
USkosana ukuqinisekisile ukuthi imali ephelele bazoyifaka zingakapheli izinsuku ezinhlanu uma isicelo sabo sokudayiselwa le kilabhu siphumelela.
- FUNDA NALA | U-Du Preez uzoyibonga enkundleni inkontileka entsha
Inkampani yabo iphinde yazibophezela ekukhokheni amaholo abadlali nabasebenzi abangakutholanga kulezi zinyanga ezimbalwa ezedlule.
Yize behlela ukulithutha iqembu liye eMpumalanga, kodwa okwamanje bahlose ukugcina le kilabhu iKwaZulu-Natal kuze kuphele le sizini.
