Okusha ‘ngecala’ lokudlaliswa kukaMokoena kwiBafana 

Kubukeka sengathi iSafa seyiphunyukile ekujezisweni obekungenzeka ngemuva kwesigameko sokudlaliswa komdlali ongafanele ibhekene neLesotho.

IBafana Bafana yashaya iLesotho ngo 2-0 kulo mdlalo owawusePeter Mokaba Stadium ngoLwesihlanu olwedlule.

ILesotho Football Association ibike yaveza ukuthi isezinhlelweni zokufaka isikhalazo ngalesi sigameko.

Kodwa manje sekuvela ukuthi isinqume ukungaqhubeki nalesi sikhalazo ebifuna ukusifaka kwiFifa. 

Imibiko iveze ukuthi iLesotho FA ibicabanga ukufaka isikhalazo ngokudlaliswa kukaTeboho Mokoena emdlalweni wokuhlungela iNdebe yoMhlaba ngoLwesihlanu olwedlule.

ILesotho FA ithi uMokoena bekumele ngabe ubemisiwe kulowo mdlalo ngenxa yokuqoqa amakhadi amabili aphuzi emidlalweni yangaphambilini. 

Lo mdlali wasesiswini weMamelodi Sundowns wathola la makhadi iBafana ibhekene neBenin ngoNovemba ka-2023 neZimbabwe ngoJuni ka-2024. 

Lokhu bekufanele kuholele ekumisweni kwakhe umdlalo owodwa. Nokho imithombo iveza ukuthi iCaf ayizange iyithumelele iSafa umlayezo ngokumiswa kwakhe. 

ILesotho FA ibinamahora angu-24 ngemuva komdlalo ukufaka isikhalazo kodwa yaqoka ukusiyeka lesi sikhalazo, okuvikise iSafa ihlazo elibi. 

• SIBAMBE NAKU-FACEBOOK | Lisenethini.co.za

ISafa, ebisiyazi ngale nkinga, imshiye ngaphandle uMokoena emdlalweni weBenin kuleli sonto.

IBafana Bafana iqhubekile nokunqoba ngo 2-0 ibhekene neBenin eStade Félix Houphouët-Boigny e-Abidjan ngoLwesibili ebusuku.

ISportswire manje ibika ukuthi iLesotho FA ikuqinisekisile ukuthi “ngeke baqhubeke nesikhalazo.” 

Lokhu kusho ukuthi iBafana Bafana isahlezi eqhulwini kuGroup C ngamaphuzu angu-13, kanti ishiya iRwanda esendaweni yesibili ngamahlanu. 

• FUNDA NALA | UBrian Baloyi uyathimula ngoBvuma ‘ogidagida ndawonye’

Nokho kusazobonakala ukuthi iFifa yina izokwenzenjani ngalolu daba njengoba kungenzeka iNigeria kube yiyo efaka isikhalazo ngalo.