Okungenza uDa Cruz asayine omunye kwiChiefs
I-Kaizer Chiefs ibukeka sengathi isiqedile ngomsebenzi wayo emakethe, kodwa uFernando da Cruz uthi kusengenzeka basayine ngaphambi kokuvalwa kwewindi.
Amakhosi asevele alethe uThabo Moloisane, uLangelihle Phili, uRenaldo Leaner no-Adolf Mtasingwa Bitegeko.
UFaiz Abrahams ufike ngokubolekiswa yiStellenbosch, kanti uKhanyisa Mayo naye usejoyine ngokuphelele.
Iwindi lokudayiselana ngabadlali kwiPSL lizovalwa ngo-22 Septhemba, kodwa isizini isivele iqalile.
UDa Cruz uthi ujabule ngeqembu analo futhi akafuni ukusayina abadlali enzela ukwandisa isibalo nje kuphela.
“Cha, ngijabule ngeqembu. Uma kungavela ithuba lomdlalo omkhulu, mhlawumbe singalithatha.
“Kodwa angifuni ukuthatha umdlali ngoba nje sesenzela ukuthi kuthiwe sisayinile,” kusho uDa Cruz.
UFernando Da Cruz ugcizelele ukuthi noma yimuphi umdlali omusha kwi-Kaizer Chiefs kumele abe negalelo elibonakalayo.
“Uma sizothatha umdlali, kufanele kube ngumdlali ozoba wusizo kithina.
“Ngakho okwamanje ngijabule ngalokho esinakho,” kwengeza lo mqeqeshi idabuka eFrance.
Lokhu kusho ukuthi iChiefs ngeke yenzele ukujabulisa abalandeli nje ngokuthi isayine ngenxa yengcindezi.
I-Kaizer Chiefs iphoxekile ngemuva kokudlala ngokulingana nePolokwane City, kodwa uFernando Da Cruz usakholelwa ohlelweni lwakhe.
- FUNDA NALA | AmaZulu achitha abafuna i‘Ngwenya’ yawo
Uthi abadlali bayaqhubeka nokujwayela indlela afuna badlale ngayo.
Sekusele isikhathi esincane ngaphambi kokuvalwa kwewindi, kanti umnyango eNaturena usavuliwe — kodwa kuphela uma kuvela umdlali ofanele.
- EZISHISAYO| Cofa lapha usithole kuWhatsApp
