Okuhlonzwe uBroos ngeBafana ‘entsha’
IBafana Bafana idlale ngokulingana ngo 0-0 neTanzania emdlalweni wobungani wamazwe omhlaba obusePeter Mokaba Stadium.
Lo mdlalo ubuyithuba lokuhlola ithalente elisafufusa ukubona ukuthi yini abangayenzela izwe ngokuzayo.
Abadlali abasha kwiBafana Bafana abayisikhombisa badlalisiwe kulo mdlalo — abahlanu kubo bawuqalile.
Okuhlonzwe umqeqeshi
Umqeqeshi oyinhloko uHugo Broos uzwakalise ukwaneliseka ngokusebenza kweqembu kukonke, ikakhulukazi uma kubhekwa isimo sokuhlola seqembu.
Uphinde wagcizelela ukuthi umphumela bekuyinto engekho phambili kuye kodwa obekubalulekile wukubona ukuthi laba badlali benza kanjani.
“Sibe neqembu elisha ngokuphelele namuhla… futhi ngijabule ngalokho engikubonile,” kusho lo mqeqeshi weBafana Bafana.
UBroos ubuvumile ubunzima bokufaka abadlali abangakaze badlale ndawonye phambilini.
Uncome umzamo weqembu nokuhleleka kweTanzania emuva njengoba ikwazile ukuvika imizamo yabo yokubahlasela.
Kodwa ugcizelele ukuthi yena ubegxile ekuhloleni ukusebenza komdlali ngamunye emdlalweni ongenayo igcindezi enkulu.
Amanothi athathwe umqeqeshi
Ukukhethwa kweqembu: Abadlali abangu-11 abaqalile babonise ukuthi inhloso wukugxilisa amasu okudlala eqembu lesizwe kubo ukubhekelela isikhathi esizayo..
Indlela okudlalwe ngayo: Iqembu libonise ukuthembisa ngokohlaka lokudlala, ukulandela amacebo okudlala yize bekudlala abadlali abangajwayelene.
Imbangi: ITanzania ibihlezi emuva futhi ihlasela ngokuzumisa. UBroos uphawule ukuthi iBafana Bafana ikwazile ukumelana nemizamo yayo yokubazuma.
Izinyathelo ezilandelayo
Ebheke phambili emdlalweni olandelayo neMozambique, uBroos ukuqinisekisile ukuthi abazoqala lowo mdlalo ngabadlali abebesebhentshini emdlalweni weTanzania.
Le ndlela iqinisekisa ukunikwa ithuba elifanayo kubo bonke abadlali abasha abakhona eqenjii.
“Yithuba elihle kulabo badlali,” kwengeza lo mqeqeshi odabuka eBelgium.
Ubekhuluma ngokubaluleka kokujwayela ukudlala esigabeni sebhola lamazwe ngamazwe ingekho ingcindezi yokunqoba.
Isiphetho
Ithimba labaqeqeshi lenelisekile ngesisekelo esibekwe kulo mdlalo. Bekugxilwe ekwakheni ukujula kweqembu.
Umdlalo weMozambique uhlinzeka ithuba lokuqhubeka kwalesi sigaba esibalulekile sokuhlola ithalente elisha.
