IChiefs ixega phambili, iPirates ishoda emuva kowomkhaya
Bobabili iKaizer Chiefs ne-Orlando Pirates bazobe bexhugela kule mpelasonto njengoba bebheke emdlalweni omkhulukazi, iSoweto Derby.
Womabili la makilabhu anenkinga yokulimala kwabadlali abamqoka kule sizini, kanti amanye amasosha awo athenjwayo awakwazanga ukufaka isandla emikhankasweni yabo ngenxa yalokhu.
Kodwa nokumiswa kwabathile ngezikhathi ezibucayi nakho kuphinde kwaba nomthelela.
Kumanje iKaizer Chiefs ne-Orlando Pirates ngamunye banomdlali oyedwa obalulekile omisiwe kulo mdlalo.
Lezi ziqhwaga ezimbili zebhola laseNingizimu Afrika zizovovana inkani eFNB Stadium emdlalweni weBetway Premiership ngoMgqibelo ngo-3 ntambama.
IKaizer Chiefs izobe ingenaye umgadli uWandile Duba kanti i-Orlando Pirates kuzomele idlale ngaphandle komdlali wasemuva uNkosinathi Sibisi. Bobabili bamisiwe.
UDuba uthole ikhadi lakhe lesine eliphuzi ngesikhathi Amakhosi ehlulwa yiMarumo Gallants muva nje.
Lo mdlali oneminyaka engu-20 ubudala usezophuthelwa yilo mdlalo omkhulu.
Yize engenawo amava atheni, uDuba ungukhiye eqenjini likaNasreddine Nabi njengoba eselishayele amagoli ayisithupha kuyo yonke imiqhudelwano kuze kube manje kule sizini.
Ukungabi khona kwakhe kuzovula isikhala esikhulu kwiChiefs ayisize ishaya iMamelodi Sundowns kowandulela owamanqamu weNedbank Cup.
IChiefs ayikawunqobi umdlalo weligi emidlalweni yayo eyisithupha edlule, futhi umdlandla kaDuba ubuzodingeka kulo mdlalo ozayo.
Njengamanje iChiefs ingaphandle kwamaqembu ayisishiyagalombili aphezulu kwilogi yeBetway Premiership.
Ukufinyelela kowamanqamu kwiNedbank Cup yikhona kuphela okuyinhlansana yokukhanya kuMakhosi kule sizini.
IPirates yona ibhekene nenkinga kulandela ukumiswa kukaSibisi oyinsika yasemuva.
USibisi ukhishwe ngekhadi elibomvu behlulwa ngo 1-0 yiSekhukhune United ngoLwesithathu.
Ikhadi elibomvu liqhamuke ngemuva kwamakhadi amabili aphuzi awathole emdlalweni ofanayo.
USibisi uyikhongco elibalulekile eqenjini likaJose Riveiro.
Njengoba abanye abadlali basemuva abanamava bengekho ngenxa yokulimala, uSibisi usale esebenza nabafana abasebancane.
Uqale wadlala noThabiso Sesane, kwathi lapho elimala, iqembu lakhuphula uMbekezeli Mbokazi.
Bobabili laba badlali abasebancane uSibisi ufike wabafaka kulayini, ebagqigquzela futhi benza kahle.
Ukungabi khona kukaSibisi kuza ngesikhathi esibi njengoba amaBhakabhaka ebheke ukubuyela emgqigqweni wokunqoba ngemuva kokuhlulwa kabili kulandelana.
IPirates ingenelwe amagoli ngendlela efanayo emidlalweni yayo emibili edlule ibhekene nePyramids neSekhukhune, okuveze ubuthaka emuva.
Manje uRiveiro sekuzodingeka aphinde ashintshe udonga lwasemuva ngaphambi komdlalo weChiefs.
ISoweto Derby ihlale ingominye wemidlalo emikhulu ebholeni laseNingizimu Afrika.
Kodwa kulokhu, womabili lamaqembu kuzofanele abhekane ngaphandle kwabadlali abambalwa ababalulekile.
Kuzothatha amehlo ukubona ukuthi bobabili abaqeqeshi bazowahlela kanjani amaqembu abo ngaphandle kwalaba badlali.
