Ngabe uNabi useyakuzwa ukushisa kwekhishi leChiefs?
Umqeqeshi weKaizer Chiefs, uNasreddine Nabi, ungaphansi kwengcindezi enkulu.
Kulokhu kuthiwa uyapheka, kodwa abalandeli ngathi abalizwa kahle iphunga eliphuma ekhishini lakhe.
Lo mqeqeshi odabuka eTunisia kodwa onobuzwe baseFrance, ujoyine iChiefs ngoJuni kodwa indlela ayihlahlayo ayikacaci namanje.
Emidlalweni engu-13 yeBetway Premiership, usanqobe emihlanu, wadlala ngokulingana kwemithathu, wahlulwa kwemihlanu – waphinde wahlulwa kwiCarling Knockout Cup.
IChiefs ihlezi endaweni yesithupha kwilogi ngamaphuzu angu-18, ilandela iMamelodi Sundowns ngamaphuzu angu-12.
ISundowns, enemidlalo emibili esandleni, ingalinweba igebe libe ngelamaphuzu angu-18 uma iyinqoba le midlalo.
Abalandeli sebeqala ukubungabaza ubuholi bukaNabi. Izikhalo zokuthi kubhekwe nakubaqeqeshi seziqalile ukuvela.
Naye uNabi ubonakala eseqala ukukhungatheka nokuvukwa wulaka olungenasidingo.
Ngemuva kokuhlulwa ngo 1-0 yiGolden Arrows ngempelasonto, uhubhe unompempe u-Olani Kwinda embuza ngokwengeza imizuzu emithathu kuphela.
Ukholwa ukuthi bekumele okungenani kwengezwe imizuzu emihlanu kulo mdlalo.
Ukuhubha kwakhe unompempe kuholele ekutheni anikwe ikhadi elibomvu okusho uzobe engekho kule midlalo emibili ezayo.
Inhloko yonompempe kwiSafa, u-Abdul Ebrahim, usivikele isinqumo sikanompempe.
“Ukwengezwe kwesikhathi yisinqumo sikanompempe, hhayi abaqeqeshi.
“Unompempe nguye onquma ukuthi singakanani isikhathi esizokwengezwa emdlalweni.
“Yingakho sibizwa ngokuthi ‘yisikhathi esengieziwe sikanompempe’,” usho kanje u-Ebrahim kwiKickOff.com.
“Abaqeqeshi namaqembu bazohlale beqagela ngoba befuna ukuzivikela.
“Kodwa ekugcineni, unompempe nguye othatha isinqumo sokugcina – kungakhathaliseki ukuthi umzuzu owodwa, imizuzu emihlanu, noma imizuzu eyishumi.
“Leso sinqumo sincike kunompempe kuphela,” kwengeza u-Ebrahim.
UNabi udinga ukulungisa izinto zakhe ngokushesha, enze iChiefs idlale ngendlela ezonika abalandeli ithemba.
Lokhu kwenza kahle namuhla, kusasa kubhede akumsebenzeli nhlobo futhi kumakhela amazinyo abushelelezi kubalandeli.
