‘Liwumawengane’ iphupho likaMhango ngeChiefs
Umgadli weMarumo Gallants, uGabadinho Mhango uvele akhumbule isiqubulo seLotto uma ecabanga ngeKaizer Chiefs.
Lo mdlali uthi ekhanda lakhe kuvele kudume ukuthi ‘one day is one day’ uma ecabanga ngokuthi wake wacishe wasayina kuleli qembu laseNaturena.
UGabadinho Mhango useke wachaza phambili ukuthi sacishe safezeka lesi sifiso sakhe, waveza nokuthi zajika kanjani izinto esethembile.
Lo mgadlo obe wavelela kwi-Orlando Pirates uthi kwakumele asayine kuMakhosi ngesikhathi esuka kuMaZulu FC ngaphambi kokuqala kwesizini edlule.
Nokho izinto azenzekanga ngendlela ayeyicabanga futhi wagcina eseMoroka Swallows.
Yize eseneminyaka engu-32 ubudala, uMhango akakadikibali futhi usazimisele ngokudlalela iKaizer Chiefs edonsa kanzima kule minyaka yakamuva.
“Kwakuyisimangaliso, ngangijabule. Ngisho nezwe lonke lainyakaza ngale ndaba, kwakuwudaba olusematheni yonke indawo.
“Abomndeni babengifonela bengibuza, ngabatshela ukuthi impela ngiya khona (kwiChiefs),” kusho uGabadinho Mhango kwi-iDiksi Times.
Nokho kwathi sekufike usuku lokuthi alibangise eNaturena, izinto zajika, kwathiwa nje ‘choo’ ungabe useza.
“Lwafika usuku, bangibuyisela emuva lapho sengisemnyango eNaturena,” kubalisa lo mgadli onekhono elihle.
“Yebo, kwangiphatha kabi kakhulu lokho ngoba ngangifuna ukuyosebenza nabo.
“Ngangifuna ukugqoka leli jezi labo lodumo,” kuqhuba le nsizwa edabuka eMalawi.
Uthi ithemba akakalilahli futhi usazibona egqoke imibala yaMakhosi esikhathini esizayo.
“Ngazitshela ukuthi akumele ngiphele amandla, isikhathi sisekhona.
“Ngiqonde ukuthi ngeke wazi, kungenzeka ngelinye ilanga kwenzeke isifiso sifezeke.”
Futhi njengoba iKaizer Chiefs ithungatha umgadli ezoqinisa ngaye ngesizini ezayo, uGabadinho Mhango angaba yisixazululo ezinkingeni zayo zokushaya amagoli.
Nokho izidubedube zakhe zezimana azenza uma engekho enkundleni zimenza iqaqa kubaphathi beChiefs abalinakekelayo igama leqembu.
