Lisha amashushu elase-Europe ngoweKaizer Chiefs
Sekuneqembu lase-Europe okuthiwa lihalela omunye wonozinti beKaizer Chiefs yize eqiwa yijezi.
Kubikwa ukuthi uFiacre Ntwari usohlwini lwabadlali abafunwa yiqembu elidlala esigabeni sesibili eFrance.
Lo nozinti waseRwanda ulizwa nbgendaba ijezi muva nje kanti kuvela ukuthi uzimisele ngokushiya eNaturena ukuze aye la azodlala khona njalo.
Ngemuva kokujoyina Amakhosi ngoJulayi nyakenye, ngenkontileka yeminyaka emine, uNtwari wavele wangena eqenjini eliqala imidlalo.
Waba ngolunye lwezinguquko ezenziwa ngokushesha ngumqeqeshi uNasreddine Nabi.
Kodwa-ke, walimala ngesikhathi edlala eqenjini lesizwe langakubo eRwanda okwenza walalekelwa yindawo yakhe kwiKaizer Chiefs.
Manje usezithola engemuva kukaBruce Bvuma osekunguye oqala yonke imidlalo kuMakhosi.
Kodwa yize elizwa ngendaba ijezi kwiKaizer Chiefs, uNtwari usaqhubeka nokudlala indima ebalulekile eqenjini lesizwe laseRwanda.
Usayisethenjwa saseRwanda futhi nguye oqale yomibili imidlalo yakamuva yokuhlungela iNdebe yoMhlaba.
Ukudlala kwakhe kahle eqenjini lesizwe kubikwa ukuthi yikho okudonse amehlo aleli qembu laseFrance.
Njengoba sekusondele iwindi lokudayiselana ngabadlali, kubhekwe ukuthi iKaizer Chiefs ithathe isinqumo ngokuthi iyamdedela yini noma iyamgcina.
Umqeqeshi weqembu lesizwe laseRwanda u-Adel Amrouche nguye odalule izindaba zokuthii kuneqembu elimfunayo.
“Kukhona ikilabhu yesigaba sesibili eFrance esiphinde yangibuza ngaye,” kusho u-Amrouche kwiFARPost.
Lo mqeqeshi odabuka e-Algeria ukholwa ukuthi uNtwari useqenjini elifanele futhi “uzothuthuka kakhulu ngaphansi kwabaqeqeshi beChiefs”.
Kodwa-ke, uzimisele ukumbona ethola ijezi njalo ukuze angalahlekelwa yifomu nokuzethemba.
“Ngiyabethemba abaqeqeshi beChiefs, futhi ngiyethemba phakathi kwamanje noJuni, uzolithola ithuba lokudlala.
“Futhi thina sizomdinga kuyo yonke imidlalo yokuhlunga,” kuqhuba u-Amrouche owake wamataniswa nomsebenzi weChiefs.
U-Amrouche uncome lo nozinti ofikele kwiTS Galaxy kuleli ngokudlala kwakhe kahle eqenjini lesizwe.
“Ubemuhle kakhulu. Bengicabanga ukuthi ukungadlali njalo kuzomphazamisa, kodwa ubemuhle.
“Uyababona ozakwabo bemethemba, futhi ngiyamethemba. Ngimethemba kakhulu ngenxa yezinga lakhe.
“Uphinde abe ngumuntu omangalisayo ukusebenza naye. Ungumuntu osebenza kanzima, futhi abadlali bayamthanda. Abantu bayamthanda eRwanda.”
