Lisaphila iphupho lePirates ngeNedbank Cup

Iphupho le-Orlando Pirates lokunqoba i-Nedbank Cup amahlandla amathathu kulandelana lisaphila.

Lokhu kungenxa yokuthi leli qembu laseSoweto likwazile ukuphunyula kunzima kwiSuperSport United esigabeni sama-quaterfinals salo mqhudelwano. 

IPirates inqobe lo mdlalo obusePeter Mokaba Stadium ngo 5-4 sekukhahlelwa amaphenathi ukuze ingene emzuliswaneni olandelayo. 

• SITHOLE KU-FACEBOOK | Cofa la, Lisenethini.co.za

Umdlali ophuma enkulisa yePirates, uMbekezeli Mbokazi uvule inkundla ngegoli lokuqala kulo mdlalo obudlalelwa kushisa kakhulu ePolokwane. 

Udonse ishodi elihle engaphakathi ebhokisini leSuperSport ngesikhathi ezithola engamakiwe ngomzuzu ka-29. 

Iphutha likanozinti elingavamile likaSipho Chaine, ophume eyokhipha ibhola waligeja, linikeze aMatsatsantsa igoli lokulinganisa. 

UTerrence Dzvukamanja usheshile, walithatha leli bhola qede wadlula ngenkani kuMbokazi, walibeka enethini. 

U-Evidence Makgopa uphinde wabeka iPirates phambili sekuyophela isiwombe sokuqala.

Isiwombe sesibili besinzima njengoba wombili amaqembu ebengakwazi ukudlala ngendlela efanele nokwakha amathuba. 

• FUNDA NALA | UNabi uhlome uyahlasela ngeChiefs koweStellies

Kodwa kuthe uma iPirates isicabanga ukuthi isifake igama layo esigqokweni okukhona kuso amaqembu azoqhathwa kweyandulela owamanqamu, kwabhimba. 

UGape Moralo uphinde wabuyisela osokhaya emdlalweni, okufake lo mdlalo esikhathini esengeziwe. 

Naso siphele lingekho eligoba uphondo, indaba yayoqedelwa phansi kwepali la besekunganqoba noma yiliphi. 

• ZITHOLE ZISHISA | Cofa la, ujoyine iWhatsApp Group yethu 

Kulapho ke iPirates iqhubekele phambili, yazibeka ethubeni lokuvikela le ndebe ye-Nedbank Cup okwesibili kulandelana.

Isizolinda ukuthola ukuthi yiliphi iqembu elizoyiphosela inselelo esigabeni esilandelayo, la kuzobe sekusele amaqembu amane kuphela.