Lidedele abanamava elidonsa kanzima kwiChampionship
- Intatheli yeLISENETHINI
Iqembu elidlala kwiMotsepe Foundation Championship, iHighbury FC selikhombe indlela abadlali abathathu.
Leli qembu elingomakoti kule ligi likumemezele kuleli sonto ukuthi sekunezinguquko eziphoqe ukukhululwa kwalaba badlali.
Lokhu kuza ngemuva kwemidlalo emihlanu nje kuphela kwisizini entsha lapho bekulindeleke ukuthi laba badlali basize ngobuholi namava eqenjini.
Laba badlali asebesliwe yizembe ngoThabiso Nkoana; uPhumlani Ntshangase; nowayengunozinti wenkulisa yeMamelodi Sundowns u-Abram Ngcobo.
UNkoana, owake waba ngumgadli weSuperSport United kanti usedlalele inqwaba yamaqembu esigabeni sokuqala.
Lo mdlali oneminyaka engu-31 ubudala ushaye amagoli ayisishiyagalombili emidlalweni engu-66 kwiSuperSport.
UNtshangase – okhombise ukuthi angaba ngumdlali omkhulu ebholeni lakuleli ezinsukwini zakhe zokuqala kwiBidvest Wits – usedlalele amanye amaqembu ambalwa.
Lo mdlali oneminyaka engu-28 ubudala udlale imidlalo engu-53 kwiWits.
UNtshangase ugcine engafikanga ezingeni ayebhekwe kulo kanti useke wadlala nakwiMaritzburg United nakwiBaroka FC.
Leli qembu elizinze e-Eastern Cape lenza lezi zinguquko nje lisendaweni ka-15 ngamaphuzu amabili kwilogi yeChampionship.
