Kuvele kwasheshe kwashuba kwiMTN8 kunqwamana izinkunzi

Sekucacile ukuthi eyodwa yezinkunzi zaseGauteng – i-Orlando Pirates neMamelodi Sundowns – izosala endleleni kwiMTN8 njengoba ingeke ifike kowamanqamu. 

Lokhu kungenxa yokuthi lamaqembu avele aqhathwa emzuliswaneni wemidlalo eyandulela owamanqamu ezoba nemilenze emibili. 

Ukuqhathwa kwamaqembu azodlala lesi sigaba kwenziwe ngeSonto ebusuku ngemuva komdlalo weSundowns neRichards Bay obuseLucas Moripe Stadium.

ISundowns ingene kulesi sigaba ngokuzidlela amahlanga kwiRichards Bay, iyibhaxabula ngo 4-0. 

Amagoli eSundowns ashaywe u-Iqraam Rayners – amabili – kwaba elikaSimphiwe Mcineka okube umkhonto ogwaza ekhaya, nelikaSiyabonga Mabena. 

IPirates yona ishaye iPolokwane City ngo 2-0 ngoMgqibelo ukuze ifike kulesi sigaba esizobhekana kuso neSundowns. 

IStellenbosch FC yona izogadulisana neSekhukhune United komunye umdlalo owandulela owamanqamu. 

Ziqhathwe kanje:

• Orlando Pirates v Mamelodi Sundowns
• Stellenbosch FC v Sekhukhune United

Imininingwane yale midlalo mayelana nezinsuku nezikhathi zayo isazoqinisekiswa yiPSL ngokuhamba kwesikhathi. 

• FUNDA NALA | U-Appollis uphawula ngesiqalo sakhe kwiPirates

Ukuqhathwa kwePirates neSundowns kweyandulela owamanqamu sekususe isasasa elikhulu ngalo mqhudelwano kwazise kuzoba ngumdlalo wamagqubu. 

• COFA LAPHA: | Usijoyine kuFacebook

Phela eminyakeni edlule iPirates ibizenzela kwiSundowns kulo mqhudelwano futhi yiyo engompetha abayivikelayo le ndebe. 

Khonamanjalo, amehlo manje asezojikela kwiBetway Premiership eqala ngempelasonto ezayo.

WINA! GCWALISA IFOMU NGEZANSI UZIWINELE IJEZI LEQEMBU LAKHO