Kumele adlale kuleli okukade ehalelwa yiChiefs
UThabo Cele useshiyile eqenjini laseRussia, iFC Fakel Voronezh abedlala kulo.
Ukushiya kwakhe kungazelelwe kungase kuvulele iKaizer Chiefs intuba yokumthola kwazise kudala yayimhalela.
Lo mdlali wasesiswini udedelwe ngenxa yenkinga yezempilo esemndenini wakhe kuleli.
Ingxenye yesivumelwano ukuthi kumele adlalele iqembu laseNingizimu Afrika, ngokubika kweFARPost.
Inkontileka kaCele bekumele iphele ngoJuni ka-2025. Lokhu kusho ukuthi kumele adlale eNingizimu Afrika kulezi zinyanga eziyisithupha ezizayo.
Isivumelwano siyamvimbela ukuthi ajoyine elinye iqembu lase-Europe mahhala.
Esitatimendeni, iFakel ukuqinisekisile ukunqanyulwa kwenkontileka kaCele.
Isimo sikaCele manje simkhomba ukuthi azodlala kwiBetway Premiership kuze kube maphakathi no-2025.
Lokhu kuveza ithuba lokuthi iChiefs imxumele njengoba naye ake asho ukuthi engathanda ukudlala kuyo uma ebuya kuleli.
Lo mdlali oneminyaka engu-28 ubudala ukwazi ukudlala izindawo ezehlukene esiswini.
UCele uyakwazi ukumaka, anqamule iminyakazo yezitha, aphinde aphase kahle uma sekuhlasela.
Ukhuliswe yi-EThekwini Football Academy kanti uqale ibhola elikhokhelayo ePortugal ngo-2016.
Ngaleso sikhathi wayeneminyaka engu-19, wajoyina iReal Sport Clube ngaphambi kokudlulela kwiBenfica B.
Kamuva, udlale ePoland naseRussia. Kule sizini, uCele udlale imidlalo engu-19.
Ukubuyela kwakhe eNingizimu Afrika kungase kuqubule isasasa nakwamanye amakilabhu akuleli.
