Kuvela ezintsha ngoRulani Mokwena neWydad
I-Wydad Casablanca isinikeze ngokusemthethweni umqeqeshi uRulani Mokwena ikhefu elikhethekile kuze kuphele isizini.
URulani Mokwena bekuvele sekuvunyelwene ukuthi uzohlukana ne-Wydad Casablanca ekupheleni kwale sizini.
Kodwa iqembu selinqume ukumdedela kusemanje, yize sekusele imidlalo emibili nje kuphela ukuthi kusongwe isizini.
ILisenethini ibike yabika ngoLwesibili ekuseni ukuthi sekunomunye umqeqeshi onikezwe izintambo yize uMokwena esekhona eqenjini.
Lokhu kubonakale njengesinyathelo sokucasula lo mqeqeshi osemncane waseNingizimu Afrika ukuze adube bese eshiya phansi.
Uma ezihambela ngokwakhe, uMokwena ubezophuthelwa yinkokhelo yokudilizwa elinganiselwa ku-R18 million.
Kodwa ezakamuva eziputshuke ngoLwesibili ntambama ziphakamisa ukuthi uMokwena usenikwe ikhefu elikhethekile.
Ngeke abuyele emsebenzini kuze kube kuphela isizini yamanje yeBotola Pro I.
Iqembu lithathe lesi sinqumo ngemuva kokungahambi kahle kwemiphumela ngaphansi kukaMokwena.
I-Wydad izoqeda umkhankaso ingawinanga sicoco, kanti kumanje ilwela ukuqeda endaweni yesibili.
URulani Mokwena ujoyine i-Wydad ekuqaleni kwale sizini kanti bekubhekwe lukhulu kuye ngemuva kwempumelelo abe nayo kwiMamelodi Sundowns.
Kodwa naphezu kwemizamo yakhe, iqembu lehlulekile ukubamba umngqigqo nokungena esitayeleni abesifuna.
Lo mqeqeshi waseNingizimu Afrika ubecele ukunikwa isikhathi sokuthi atshale kahle amaqhinga akhe kubadlali.
I-Wydad beyenze izinguquko ezinkulu eqenjini ngaphambi kokuthi uRulani Mokwena aqale kulo msebenzi wakhe.
UMokwena ubecele isikhathi sokwakha kabusha, kodwa ingcindezi yabalandeli yaba ngaphezu kokwenza.
Kubikwa ukuthi naye uxabane nezikhulu zeqembu nabalandeli ngesikhathi bengazwani ngokwemibono.
UMokwena ube nomuzwa wokuthi abanye babantu abangaphakthi ekilabhini bebefuna ahambe.
Naphezu kokugxekwa, wenqaba ukushintsha indlela yakhe afuna iqembu lidlale ngayo.
Wathi angancamela ukuxoshwa kunokuthi ayekethise ifilosofi yakhe yebhola.
Isinqumo seWydad sokuhlukana noMokwena siqeda ihlandla lakhe lokuqala esebenza eNyakatho Afrika.
Isikhathi sakhe kule kilabhu sibe sifishane kodwa besigcwele iziyaluyalu eziningi.
Ngaphambi kokujoyina iWydad, uMokwena ubeqeqesha i-Orlando Pirates neMamelodi Sundowns.
Uwine izicoco ezimbalwa neSundowns futhi wazuza nedumela lokuqhamuka namacebo amasha okudlala.
Ukuthuthela kwakhe kwiWydad kubonakale njengesinyathelo esikhulu, kodwa akuzange kuphumelele njengoba bekulindelwe.
Akukacaci manje ukuthi kuzobe kuyini umnyakazo olandelayo kaMokwena.
Kukhona abamkhomba emuva kwiPirates, kanti abanye abalandeli beKaizer Chiefs bamfisa eNaturena.
