Kubatshazwa obolekiswe yiPirates kwele-ABC League
I-Orlando Pirates kubikwa ukuthi iqaphe ngeso lokhozi umdlali osemncane okuvela ukuthi usehehe amehlo amanye amakilabhu ePSL.
UThabo Mphaki, oneminyaka engu-18 ubudala, ubolekwe yi-Orlando Pirates kwiWits edlala kwi-ABC Motsepe League eGauteng.
Imithombo iveza ukuthi uMphaki angase abuyele kwi-Orlando Pirates maduze alwele indawo eqenjini elikhulu noma aqale kweleDDC.
Lo mfanyana oteketiswa ngelikaNasri kuthiwa unobuhlakani nekhono elimangalisayo, kanti usehlabe umxhwele kwiWits.
Usebenzisa unyawo lwesokudla, uyashesha, futhi unesiphiwo sokususa indoda phambi kwakhe.
Manje iPirates kubikwa ukuthi imqaphe ngeso lokhozi njengoba yenza izinhlelo zesizini ezayo.
Kukholakala ukuthi leli qembu lihlela ukuhlela kahle isikwati salo kanti uMphaki ungomunye wabangase babuyiswe kwabebebolekisiwe.
“UMphaki ungelinye lamathalente athembisayo njengamanje,” umthombo ucashunwe usho kanje kwiSoccer Laduma.
“Usekhombise ukukhhla kwiWits futhi iPirates ingase ifune ukumbuyisa, izomhlola eqenjini elikhulu ukuthi wenza kanjani.”
UMphaki waqala ukuzakhela igama ngo-2022 ngesikhathi edlala kwi-Engen Championships eneminyaka engu-15 nje kuphela.
Ngaleso sikhathi wayesenkulisa yeKaizer Chiefs futhi wadonsa amehlo eSundowns nawamaqembu athile e-Europe.
Kodwa yi-Orlando Pirates eyamhlwitha yabe seyimthumela kwiWits ukuze athole amava.
Leso sinyathelo manje sesithela izithelo njengoba ekhombisa izimpawu zokuthuthuka okukhulu.
Ifomu yakhe enhle kuvela ukuthi isidonse amehlo ezinhlozi zeSekhukhune United, iTS Galaxy, ne-Orbit College FC.
Kodwa iPirates ingase ifune ukusigcina yona lesi sihlabani sayo esisafufusa.
“Usekhule kakhulu futhi akaselona ithalente elingavuthiwe abeyilo ngesikhathi ekwiChiefs,” kuqhuba umthombo.
“Kukhona umuzwa onamandla manje wokuthi sekuyisikhathi sokummfaka eqenjini elikhulu.”
Njengoba izinhlelo zokushintshwa kweqembu ziqhubeka, iPirates ingase ibheke ukuqinisa ngaye uMphaki.
Abalandeli bangase bambone enza izinto zakhe kwiBetway Premiership ngesizini ezayo.
Isinqumo manje sincike kubaphathi beqembu noma kumqeqeshi omusha ozothatha indawo kaJose Riveiro.
