Aqophe umlando Amajita edla ese-Afcon, kwagiya uMosimane
UPitso Mosimane ugiye ngosiba eba ngomunye wabokuqala ukuncoma iqembu lesizwe laseNingizimu Afrika labaneminyaka engaphansi kuka-20, Amajita.
Lokhu kungemuva kokuthi Amajita enqobe isicoco seCaf Under 20 Africa Cup of Nations.
Amajita ashaye iMorocco ngo 1-0 emdlalweni wamanqamu ngeSonto ebusuku.
Igoli eliweze leli qembu elicijwa uRaymond Mdaka lishaywe uaGomolemo Kekana.
Ibhola ubeliphakelwe ngunozinti uFletcher Smythe-Lowe, okhiphe iphasi kanokusho isuka emuva.
Lokhu kunqoba kuphawule isicoco sokuqala ngqa seNingizimu Afrika kulesi sigaba sebhola.
UPitso Mosimane – ozakhele igama eqeqesha iMamelodi Sundowns ne-Al Ahly – ujoyine abathandi bebhola abaningi ekugubheni lesi sikhathi esiyingqophamlando.
“Iqembu laseNingizimu Afrika lika-Under 20 linqobe i-Afrika,” ubhale kanje lo mqeqeshi ezinkundleni zokuxhumana.
“Singompetha base-Afrika. Saze sasihle lesi sikhathi empilweni yethu lapho iNingizimu Afrika ithola yonke le mpumelelo.”
Leli qembu eliholwa ngumqeqeshi uRaymond Mdaka lithole ukunconywa ezweni lonke ngokuzimisela nokuziphatha ngendlela efanele.
Lokhu kuwina ukwengeza kwalo ekukhuleni kwethemba ngebhola laseNingizimu Afrika.
Khonamanjalo, Amajita aphinde ahlomula nangezindodo zomdlali ngamunye sekuklonyeliswa abenze kahle kulo mqhudelwano.
UFletcher Lowe-Smythe uqokwe njengonozinti walo mqhudelwano ngemuva kokungangenelwa goli emidlalweni emine kweyisikhombisa ayidlalile.
Kule midlalo emine angangenelwanga goli kuyo kukhona eyesigaba somkhumulajezi emithathu – okuyi-quarter-final, owandulela owamanqamu nowamanqamu.
UTylon Smith, oshaye igoli lokunqoba emdlalweni owandulela owamanqamu uqokwe waba nguMdlali oVelele walo mqhudelwano obuse-Egypt.
I-Morocco yona ihambe nomklomelo we-Fair Play, onikwa iqembu elikhombise ukuziphatha kahle nomoya ofanele webhola.
UMomoh Kamara waseSierra Leone yena ubambe nowomshayimagoli ohamba phambili kulo mqhudelwano ngamamagoli akhe amane.
