Konke odinga ukukwazi nge-MTN8 evula isizini

IPremier Soccer League (PSL) isikhiphe ngokusemthethweni uhlelo lwemidlalo ye-MTN8, okuwumqhudelwano wokuqala wesizini ka-2025/26.

Lo mqhudelwano oqhatha amaqembu ayisishiyagalombili uzokwethula isizini ka-2025/26 elindelwe ngabomvu ngemidlalo eshisayo.

I-MTN8, okudlala kuyo amaqembu aqede ezindaweni eziyisishiyagalombili eziphezulu kwiBetway Premiership, iqala ngempelasonto ka-Agasti 2-3.

Futhi imidlalo yomzuliswano wokuqala ithembisa imidlalo ejabulisayo zisuka nje. Imidlalo uyokuqala izoba ngo-Agasti 2.

NgoMgqibelo, 2 Agasti:

• Umdlalo: Orlando Pirates vs Polokwane City
• Inkundla: Orlando Stadium
• Isikhathi: 3pm

 Ompetha abavikela lesi sicoco i-Orlando Pirates baqala ukuvikela isicoco sabo ngokubhekana nePolokwane City emdlalweni okulindeleke ube nzima kuwo womabili amaqembu. 

AmaBhakabhaka aphakamise indebe ye-MTN8 iminyaka emithathu ilandelana ngaphansi kukaJose Riveiro.

Manje azobe efuna ukuqhubeka nokubusa kulo mqhudelwano ngaphansi komqeqeshi omusha u-Abdeslam Ouaddou.

• Umdlalo: Sekhukhune United vs TS Galaxy
•   Inkundla: New Peter Mokaba Stadium
•  Isikhathi: 6pm

 Lona ngumdlalo obukeka uzodla ngobunzima nokungaqaguleki phakathi kweSekhukhune United eqede endaweni yesine neTS Galaxy eqede kweyesihlanu. 

Womabili lamaqemu enze izinguquko ezinqala njengoba kuvalwe isizini futhi azobe ebheke isiqalo esihle.

NgeSonto, 3 Agasti:

• Umdlalo: Stellenbosch FC vs AmaZulu FC
•  Inkundla: DHL Stadium
•  Isikhathi: 3pm

 Ngemuva kokuhluleka kowamanqamu ngesizini edlule, iStellenbosch izobuya ibheke ukwenza kangcono kulokhu.

Nokho kuzomele izibambe ziqine. AmaZulu FC azobe ebheke ukushipha kudliwa eKapa njengoba nawo ebheke ukuzibeka ethubeni lokudla indebe yawo yokuqala.

• Umdlalo: Mamelodi Sundowns vs Richards Bay
•  Inkundla: Lucas Moripe Stadium
•  Isikhathi: 6pm

 Ompetha beligi iSundowns bazobe behlose ukwengeza i-MTN8 ekhabetheni labo lezindebe elivele liyachichima.

• FUNDA NALA | IPirates icacisa eka-R120m ‘ezowuthola’ ngoMofokeng

Nokho le ndebe yayigcina ngo-2021 okuzokwenza ukuthi iyihalele kakhulu futhi isifiso sokuyidla sibe phezulu. 

IRichards Bay, ezobe idlala okokuqala kulo mqhudelwano, ibukeka izothwala uthayela kunomoya kulo mdlalo.

• COFA LAPHA: | Usijoyine kuFacebook

I-MTN8 ayinikezi nje kuphela umklomelo ka-R8 million kwabawinile kodwa futhi ibeka ithoni kuyo yonke isizini. 

Ngamaqembu aqinile, ukusayinwa okusha, kanye nezigxobo eziphezulu, abalandeli bangalindela iziqhumane kusukela kumpempe yokuqala.

WINA! GCWALISA IFOMU NGEZANSI UZIWINELE IJEZI LEQEMBU LAKHO