Isamba esifunwa ngohalelwa yiChiefs neSundowns
Iziqhwaga zaseTanzania, i-Azam FC, sezibeke isamba ngomdlali ezinqabile ukumdayisa ngesikhathi iKaizer Chiefs neMamelodi Sundowns befika bezocela ukudayiselwa yena.
Lamakilabhu aseNingizimu Afrika, iKaizer Chiefs neMamelodi Sundowns wobabili kubikwe ukuthi ake afaka izicelo ngokwehlukana ngalo mdlali oyigugu we-Azam.
Kubikwa ukuthi iKaizer Chiefs yabeka uR15 million etafuleni, iMamelodi Sundowns yona yabeka uR35 million kodwa bachithwa bobabili.
Leli qembu laseTanzania lakubeka kwacaca ukuthi alizimisele ukudayisa lo mdlali okwamanje ngoba lisamdinga.
- SILANDELE KU-FACEBOOK | Cofa la, Lisenethini.co.za
Manje sekuvela ukuthi lo mdlali, uFaisal Salum usetshele iqembu ukuthi angathanda ukuthola inselelo entsha kwelinye iqembu.
Nokho kubukeka kungenakwenzeka ukuthi imali efunwa yi-Azam ingakhokheka ngisho nayiSundowns eyaziwa ngamaphakethe ayo ajulile imbala.
Ngokombiko we-SNL.com, le kilabhu yaseTanzania izimisele ngokudayisa uSalum kodwa noma yiliphi iqembu elimfunayo kumele likhokhe imali elinganiselwa ku-R183 million.
“Uma sithi akadayisi, besisho ukuthi akekho emakethe ngoba usenenkontileka neqembu,” kucashunwe esho kanje isikhulu se-Azam uHasheem Ibwe.
“Kodwa uma noma yiliphi iqembu lisondela ku-Azam elinentshisekelo yokuqalisa isigatshana sokuthenga anaso ngeke sibe nenkinga.”
Lesi sikhulu sithe isamba abasifunayo sihlukile emaqenjini aseTanzania njengoba ibekwe ku-R36 million.
Kodwa eqenjini elingaphandle kwaseTanzania, siku-R183 million okungenzeka ukuthi ngisho neSundowns ayizimisele ukuyikhokha.
“Asikwazi ukumisa iqembu elifuna ukusebenzisa isigatshana esikwinkontileka yakhe esivumela ukuthi athengwe futhi yilapho esikhona njengeqembu,” kwengeza u-Ibwe.
- FUNDA NALA | Ay akuhambanga kahle kwiPirates, uRiveiro uyachaza
“Yileyo ndlela esimazisa ngayo lo mdlali. Leli yibhola, uyazi ukuthi lisebenza kanjani.
“Uma iqembu lifika lizomcela, sizobatshela ukuthi sifuna malini bese siqala ukuxoxisana sisuka lapho.
“Futhi siyazi ukuthi awekho amaqembu amaningi angakwazi ukukhokha le mali. Yingakho engadayiswa, kulapho esimi khona.”
