IRichards Bay iqede ukuqagula iqoka umqeqeshi omusha
Iqembu laKwaZulu-Natal elidlala kwiBetway Premiership, iRichards Bay seliqoke uPapi Zothwane njengomqeqeshi walo omusha.
Lokhu kuqokwa kuzomangaza abaningi abebelindele ukuthi kube uClinton Larsen othatha lo msebenzi.
ULarsen noZothwane bbebekade besebenza ndawonye kwiMagesi FC ekuqaleni kwesizini.
Laba bobabili bahole iMagesi ngesikhathi inqoba iCarling Knockout Cup, yehlula iMamelodi Sundowns kowamanqamu ngoNovemba.
Ngemuva kwalokho kunqoba, uLarsen washiya isigubhukane kwiMagesi, kwangena u-Owen da Gama esikhundleni sakhe.
Kubikwa ukuthi kuqubuke ukungezwani phakathi kukaDa Gama noZothwane obekade eyiphini likaLarsen phambilini.
Lokhu kuholele ekutheni uZothwane naye ashiye kwiMagesi ngoLwesihlanu olwedlule.
Ekuqaleni, bekukholakala ukuthi uZothwane uzojoyina iRichards Bay njengengxenye yethimba labaqeqeshi likaLarsen.
Kunalokho uZothwane useqokwe njengomqeqeshi kanti ekaLarsen ayisaphathwa nokuphathwa kuleli qembu laseKZN.
UZothwane ungena esikhundleni sabaqeqeshi abebebambe isikhashana uRonnie Gabriel noSboniso Gumede.
Ngaphansi kwalaba bobabili, iRichards Bay inqobe umdlalo owodwa kuphela kweyisithupha.
Leli qembu lihlulwe kwemine ladlala ngokulingana kowodwa, lasala lisendaweni ka-14 kwilogi yeBetway Premiership.
IRichards Bay inamaphuzu ayisishiyagalolunye emidlalweni engu-14. Iphambili ngamabili kwiMagesi esemsileni.
