IPirates ‘iyixolele’ iSuperSport, yayinika uswazi oluncane
- Sibongiseni GUMBI
I-Orlando Pirates ayenzanga njengomakhelwane bayo iKaizer Chiefs ngesikhathi ibhekene neSuperSport United emdlalweni weligi.
IChiefs iyibhabhadise ngo 4-0 iSuperSport emdlalweni wendebe ngempelasonto, kanti nePirates beyinethuba lokwenza okufanayo ngoLwesibili ebusuku.
Nokho ezikaJose Riveiro azikwazanga ukushaya amagoli amaningi, zagcina zinqobe ngamaboli amabili – elingene ngomzuzu wesibili nelingene sekusesikhathini esengeziwe.
Leli goli lishaywe u-Evidence Mkgopa othole ibhola elide ebelisuka kuThabiso Sesane, waliphambanisa nonozinti obezama ukuzomvimba.
IPirates ithole inqwaba yamathuba ngemuva kwalokho kodwa yehluleka ukuwasebenzisa.
Nokho kuthe sekubukeka umdlalo uzophela ngawo u 1-0, uDeon Hotto, obeseshintshiwe esedlala phambili, washaya elihle igoli ukwenza kube u 2-0 oqinisekise amaphuzu amabili kwiBucs.
Lamaphuzu ayibeke phezulu kwilogi yeBetway Premiership iPirates njengoba seyinamaphuzu angu-12 ngemuva kwemidlalo emine.
Nokho kungenzeka kube okosuku olulodwa ukuqhwakela kwayo njengoba iMamelodi Sundowns izobuyela phezulu uma inqoba ngoLwesithathu.
ISundowns izokwemukela iRoyal AM eLoftus Stadium emdlalweni weligi ngoLwesithathu ngo-7.30 ebusuku.
