IPirates ichithe ababili, ivula isikhala sabeza ngoJanuwari
I-Orlando Pirates ikuqinisekisile ukuthi leli qembu selihlukene noSandile Mthethwa, kanti uKatlego Otladiso uzobolekiswa kwiSekhukhune United.
Bobabili laba badlali bahlulekile ukungena eqenjini eliqala imidlalo kwiBucs kanti abakadlali nowodwa umdlalo kule sizini.
UMthethwa uke waba sebhentshini ngesikhathi iPirates idlala umdlalo wayo wokuqala emzuliswaneni wokuhlunga kwiCaf Champions League.
Abadlali abafana noThabiso Sesane, Tapelo Xoki, Nkosinathi Sibisi, Olisa Ndah benze kwaba nzima ukuthi lo mdlali wasemuva odabuka KwaZulu-Natal adlale.
“I-Orlando Pirates Football Club ingaqinisekisa ukuhamba komdlali wasemuva uSandile Mthethwa,” kusho iPirates esitatimendeni ngoLwesihlanu.
“Zombili izinhlangothi zivumelene ngokuhlukana ngokuthula ukuze athuthele ekilabhini azozikhethela yona.
“Njengoba uMthethwa eseneminyaka engu-27, usesezingeni la edinga khona ukudlala njalo.
“Futhi yize ithimba labaqeqeshi belisfisa ahlale, kodwa belingeke limnike isiqiniseko sokuthi uzodlala njalo.
“UMthethwa ujoyine leli qembu ngo-2016 esengumfanyana omncane ngemuva kokuthi ehlonzwe emqhudelwaneni waminyaka yonke wentsha e-KZN.
“Ubengomunye wabadlali abathathu abahlonzwa kulo mqhudelwano – abanye ababili uThobela Sikhakhane noBrian Hlongwa.
“Uzokhunjulwa ngobungcweti bakhe nokuziphatha kwakhe ngaso sonke isikhathi.
“Simfisela okuhle kodwa njengoba engena esahlukweni esisha emsebenzini wakhe.”
UMthethwa uzokhunjulwa ngokushaya igoli elanqobisa iPirates emdlalweni owandulela owamanqamu weNedbank Cup neKaizer Chiefs eFNB Stadium.
U-Otladisa ujoyine iPirates ekuqaleni kwesizini edlule esuka kwiMarumo Gallants naye ukuthole kunzima ukuthola indawo kwiPirates.
“Khonamanjalo, ikilabhu ingaqinisekisa nokuthi isifinyelele esivumelwaneni neSekhukhune United ngoKatlego Otladisa,” kwengeza iPirates esitatimendeni.
“Lo mdlali oneminyaka engu-28 ubudala uzoya kwiBabina Noko ngesivumelwano sokubolekiswa isikhathi esisele sesizini ka-2024/25.”
Njengoba ichitha laba ababili, iPirates kulindeleke iqinise ngabanye abadlali abambalwa ngoJanuwari.
Baningana ke abadlali abamataniswa nayo okukhona kubo noJayden Adams weStellenbosch FC.
