Inkiyankiya yeRoyal AM: I-PSL nesinqumo ngesibalo samaqembu
I-Premier Soccer League (PSL) isiqhamuke nesixazululo sokuqinisekisa ukuthi inesibalo esifanele samaqembu ezigabeni zayo.
Lokhu kulandela utalatiya i-PSL esithole ikulo ngenxa ye-Royal AM esigcine ixoshiwe ezigabeni zale nhlangano ephethe ibhola elikhokhelayo kuleli.
Manje sekuvele ukuthi izocela iSafa ukuthi ikhuphule amaqembu amathathu asuka kwi-ABC Motsepe League aye kwiMotsepe Foundation Championship kule sizini.
Lesi sinyathelo siphetha inkulumo yokuthi kungase kwandiswe amaqembu eBetway Premiership abe ngu-18 ngesizini ezayo.
Lolu shintsho luza ngemuva kokuthi ubulungu be-Royal AM bunqanyuliwe ekuqaleni kwale nyanga yisigungu se-PSL.
Esikhundleni sokufaka elinye iqembu esikhundleni seRoyal AM, iPSL ifuna iSafa ikhuphule iqembu elengeziwe lisuka ezigabeni zayo.
Lokhu kulandela umhlangano weBoard of Governers (BOG) yePSL obungoLwesine wokubhekana nodaba lweRoyal AM.
Emasontweni ambalwa edlule, iBOG ivotele ngo-elethu ukunqamula ubulungu beRoyal AM.
Yonke imidlalo ebandakanya iRoyal AM manje isikhishiwe kumarekhodi eligi.
Lesi sinqumo sisho ukuthi isizini yePremiership izophela wonke amakilabhu edlale imidlalo engu-28.
Umthelela omkhulu walokhu, nokho, uzozwakala kwiChampionship – isigaba sesibili sebhola elikhokhelayo eNingizimu Afrika.
Njengoba i-Royal AM ingaseyona ingxenye yebhola elikhokhelayo, i-PSL manje idinga ukugcwalisa isikhala.
Imithombo itshele iSABC Sport ukuthi iPSL izocela iSafa ukuthi ikhuphule amaqembu amathathu esikhundleni samabili aphuma kwi-ABC Motsepe League.
Lolu shintsho luzolinganisa izinombolo kuzo zonke izigaba ngaphandle kokukhulisa isibalo samaqembu esigaba esiphezulu.
Imidlalo yokuhlunga iqembu elizongena kwiBetway Premiership isazoqhubeka njengenjwayelo.
Uma iSafa ivuma, ukukhuphula iqembu elengeziwe, lokhu kuzokwenzeka emasontweni ezayo.
Lokhu kusiza i-PSL ukuthi igweme ukubumba kabusha ukwakheka kwayo kweligi ngemuva kokuphuma kweRoyal AM.
