Inkinga yomgadli kwiChiefs: ngabe uMayo yisisombululo?
IKaizer Chiefs inesinqumo sinqala okumele isithathe ngoKhanyisa Mayo – ikhipha imali imthenge noma idlulele phambili.
Kodwa, ngabe uMayo ungumgadli ongalibheki ipali lo abamdinga kakhulu, noma uzophindaphinda ithalente elivele likhona eqenjini?
Impendulo kungenzeka incike ekutheni umqeqeshi uNasreddine Nabi ufuna uhlobo olunjani lomgadli ngokwamacebo nohlaka lwakhe lokudlala.
Ukukhathazeka sekuvele kuqalile ngomgadli omusha uFlavio Silva obukeka engeke ayisombulule inkinga yamagoli.
Lokhu kungase kuphushe iGlamour Boys ukuthi iqhubeke nokuzingela umgadli osezingeni.
Njengamanje idinga umgadli onamandla okwazi ukushaya inethi – inkinga akulula ukumthola.
Umqeqeshi uNabi uzivumele ngokwakhe ngoJanuwari ukuthi uMakabi Lilepo, yize engumdlali wasophikweni, ubephoqeleka ukudlala njengomgadli.
Lokhu kwenzeke ngisho nangemva kokusayinwa kukaTashreeq Morris ngoJanuwari esuka kwiSuperSport United.
Uma kwenzeka uSilva ethatha isikhathi ukuzinza, iKaizer Chiefs kubikwa ukuthi icabanga ukuyozama ukuthenga uKhanyisa Mayo.
Uyise kaKhanyisa, uPatrick useke wakuveza ukuthi leli qembu linesifiso ngale ndodana yakhe.
Inkinga wukuthi kuzomele liyomthenga njengoba uMayo esasele neminyaka emibili enkontilekeni yakhe kwiCR Belouizdad.
Ukufaneleka kuka-Mayo kwi-Chiefs: Kuncike ohlakeni lokudlala
Umbuzo omkhulu kwiChiefs wukukwazi kukaMayo ukudlala nengomgadli omayo phambili.
KwiCape Town City ubejwayele ukudlala uNo. 10, okuyindawo lapho iChiefs isivele inabadlali abaningi kuyo.
Ukwengeza uMayo kungase kube wukwandisa isibalo nje ngokungenasidingo futhi kungayiqedi inkinga yamagoli.
Ingwazi yaMakhosi, uTsepo Masilela isike yakuzwakalisa ukungabaza kwayo uMayo esiteshini seYouTube seSoccerbeat.
“Uma ubheka lo mdlali, kumanje akekho kwiBafana, bese uzibuza imibuzo…
“Kungani engekho? Ingabe muhle ngokwanele ukudlalela iBafana?” kubuza uMasilela.
Uqhube wathi, “Uma ufika kwiKaizer Chiefs, angicabangi ukuthi nguyena ozoqeda, umgadli ovelele ozokwazi ukushaya amagoli angu-15 ngesizini.
“Uma uMayo eshisa uyashisa kakhulu kodwa uma engashisi, ukushiya unwaya ikhanda.”
UMasilela ukholwa ngokuqinile ukuthi iChiefs kufanele ibheke kwenye indawo ukuthola umgadli ofanelekayo.
IChiefs kumanje imataniswa nomgadli obekwiMamelodi Sundowns kodwa ebolekiswe emaqenjini ehlukene u-Ighodaro Godspower.
