Imenenja kaMbokazi isiziphendulele ‘ngokweyiswa’ uBroos
Seyiqale phansi impi yamagama phakathi komqeqeshi weBafana Bafana uHugo Broos nemenenja yabadlali uBasia Michaels.
Ephendula ngokugxekwa kwakhe yilo mqeqeshi, uMichaels uchaze amazwi kaBroos ngokuthi “acwasa ngokobulili” futhi “aneziswana”.
Lokhu kukhomba umoyana ongemuhle phakathi kweqembu lesizwe nekhempu yesinye sezihlabani ezithembisayo zebhola kuleli.
Lo mdlali wasemuva oneminyaka engu-20 ubudala usanda kusayina inkontileka okuthiwa ngeyemali enkulu esuka kwi-Orlando Pirates eya eqenjini leMLS iChicago Fire.
INTOMBAZANYANA EZITSHELA UKUTHI IYAZI
Ukungezwani kwaqubuka ngesikhathi kunesithangami sabezindaba seBafana Bafana ngoDisemba.
Kulapho uBroos – owayethukuthele egane unwabu – wagxeka khona uMbokazi ngokufika ekhempini sekwedlule isikhathi ayebekelwe sona.
Waphinde waveza ukungenami kwakhe nokungabaza ukuthi umnyakazo wakhe wokuya e-United States ungophusile.
USEVELE WABHODLA
Ngesikhathi sokucasuka kwakhe, uHugo Broos wabiza uMichaels ‘ngowesifazane omncane ocabanga ukuthi wazi ibhola’.
Ngaleso sikhathi uMichaels wenqaba ukuphawula ngalolu daba, kodwa manje ekhuluma neSABC Sport, uMichaels uvele wabhodla.
“Kimina, ngingakutshela nje ukuthi akungabazeki ukuthi lokhu akusho kwakuwukucwasa ngokobulili,” kusho uMichaels.
“UHugo Broos angathatha noma yiziphi izinqumo zakhe ngendlela afuna ngayo…
“Kodwa lokho akumvumeli ukuthi angangihloniphi mina, uMbokazi, noma i-Orlando Pirates neKaizer Chiefs.”
UMBANGO: Europe v MLS
UBroos phambilini uphakamise ukuthi ukuthuthela kukaMbokazi kwiChicago Fire kuqhutshwa “ukungacabangisisi kahle” nokuhubha imali.
Waveza ukuthi lo mdlali bekumele alinde aze athole iqembu e-Europe, acabanga ukuthi bekuzokwenzeka ngemuva kwe-Afcon.
Nokho, uMichaels uveze okwehlukile, futhi kuyacaca ukuthi e-Europe abamboni kahle uMbokazi:
- Ukubolekiswa: Ngemva kwe-Afcon, uMichaels wathola ucingo mayelana eqenjini ebelifuna ukubolekwa uMbokazi.
Uthi obekubekwa etafuleni bekuwukwedelela nje uma kuqhathaniswa nalokho okukhishwe yiChicago Fire.
- Ukuthatheka kancane: UMichaels ugcizelele ukuthi nangaphambi kokusayina kwiChicago, amaqembu ase-Europe abefuna ukumthenga ‘ngamakinati’ lo mdlali.
Uthe umnyakazo wokuya kwiMLS unikeza lo mdlali oneminyaka engu-20 ubudala inkundla engcono kakhulu yokukhula ngokushesha.
UMTHELELA KWIBAFANA
Okukhathaza kakhulu manje wukuthi ingabe uBroos njengoba “engayithandi iligi yase-US” uzoqhubeka yini nokubiza uMbokazi eqenjini lakhe.
Yize lo mqeqeshi axolisa ngokuthi usebenzise amagama angafanele, wagcizelela ukuthi umile kwelokuthi akubanga wumqondo omuhle ukuya kukaMbokazi e-US.
UMichaels yena usale nokungabaza ngekusasa lalo mdlali ngaphansi kwalo mqeqeshi waseBelgium.
YISHWA ELIKHULU
“Akuzukuba nandaba ukuthi uMbokazi udlala kahle kangakanani ezinyangeni ezine ezizayo ngoba uBroos usevele unesinqumo ekhanda lakhe…
“Yena akayithandi le ligi akuyo, engicabanga ukuthi kuyinto eyishwa elikhulu.”
Njengoba sekusondele iNdebe Yomhlaba ka-2026, iBafana Bafana ayikwazi ukulahlekelwa yinsika yayo odongeni lwasemuva ngenxa yombango wezikhulu.
FUNDA NALA | Kushayisana imiyalezo ngamathikithi eDabhi
Ukuthi uHugo Broos uzokwazi yini ukukhohlwa yigama leligi, bese ebuka umgqiqgo kaMbokazi sekuzobonakala ngokuhamba kwesikhathi.
