ILupopo seyifake esayo isikhalo nge-Orlando Pirates
ISaint-Eloi Lupopo isifake isikhalo kwiConfederation of African Football (Caf) nge-Orlando Pirates ngesikhathi kusalindwe isinqumo sezikhalo ezifakwe yileli qembu laseSoweto.
Leli qembu laseDR Congo likhala ngokuhlukunyezwa kwabadlali balo nangokuthile okwafuthwa egumbini lalo lokushintshela.
ISt Eloi Lupopo iwashise i-Orlando Pirates ijezi kwiCaf Champions League, iyishaya ngo 5-4 sekukhahlelwa amaphenathi ngemuva kokuthi umdlalo wemilenze emibili uphele ngo 3-3 sekuhlanganiswe imiphumela.
Yomibili le midlalo yaba nezigigaba zokuxabana nokushuba kwesimo. Kwaba nokuhilizisana okushubile ngaphambi komlenze wokuqala eLubumbashi kwaphinde kwaqubuka impi emlenzeni wesibili e-Orlando Stadium.
I-Orlando Pirates yabe seyifaka izikhalo kwiCaf, ikhala ngomqeqeshi weLupopo uGuy Bukasa nabadlali ababili — oHenoc Molia noRamos Khashala Wanet.
Kubikwa ukuthi amaBhakabhaka athi uBukasa ubengafanele ukuhlala ebhentshini ngenxa yokumiswa ngenxa yesigameko se-Afcon ka-Under 20 eMorocco.
Iphinde yathi uMolia ubhaliswe sekuvawe iwindi lokudayiselana ngabadlali, kanti ukufaneleka kukaWanet kuyaphikiswa ngenxa yokuba namaphasiphothi amabili.
Khonamanjalo, unobhala-jikelele weLupopo uJean Luc Kapend ukuqinisekisile kwiKickOff.com ukuthi ikilabhu isicele iCaf ukuthi ivale i-Orlando Stadium.
Bafuna nokuthi lezi zimbanngi zabo zaseNingizimu Afrika ziqondiswe ubugwegwe.
“Kuyamangaza ukuthi ngasohlangothini lwethu akukho okubikiwe — nathi safaka izikhalo nge-Orlando Pirates,” kusho uKapend.
“Sifake izikhalazo ngezenzo zobudlova kubadlali bethu nabaqeqeshi, nokufafaza kwezinto ezinobuthi egumbini lokushintshela.
“Isikhalazo sethu sisekelwe ngamavidiyo angaphezu kuka-10, kuhlanganise nalawo abonisa imikhuba yobuthakathi.
“Siphinde safaka isikhalazo kwiCaf sifuna ukuba kumiswe i-Orlando Stadium ingasetshenziselwa imidlalo yeCaf.”
FUNDA NALA | Kumiswe abamqoka kuMaZulu neChiefs
ICaf isazokhipha isitatimende esisemthethweni ngalolu daba njengoba womabili amakilabhu elinde ukubuyekezwa kwezikhalazo zawo.
ZITHOLE ZISHISA: Cofa lapha usithole kwiWhatsApp Channel yethu
