Ilihlele ngendlela exakile ithimba labaqeqeshi iDurban City
Owayengunozinti weBafana Bafana neKaizer Chiefs uRowen Fernandez usejoyine i-Durban City njengomqeqeshi wayo wonozinti omusha.
Lokhu kuqashwa kwakhe kwengeza olunye ungqimba lwesipiliyoni ekusethweni kwethimba labaqeqeshi osekuvele kumangaze abaningi.
Ithimba labaqeqeshi le-Durban City linoGavin Hunt ongumqeqeshi no-Ernst Middendorp ongumqondisi wezokuqeqesha.
Futhi manje sekwengezwe uFernandez kuleli thimba elinezingwevu ezisanda kuhluleka kwamanye amaqembu.
UHunt uxoshwe kuwo wonke amaqembu abeqeqesha kuwo kumasizini amane edlule okufaka neSuperSport United.
UMidderndorp yena usanda kuhola iCape Town Spurs idliwa yizembe kusuka kwiBetway Premiership yaze yayosithela ezigabeni zama-amesha.
UFernandez, owayengunozinti wadlala imidlalo engu-23 kwiBafana Bafana futhi waba nempumelelo enhle namakilabhu afana neChiefs, iBidvest Wits, ne-Arminia Bielefeld yaseGermany.
Manje useletha ubuchwepheshe bakhe kwiDurban City njengoba ikilabhu ilungiselela umkhankaso wayo wokuqala ngemuva kokubuyela esigabeni esiphezulu.
Wayekhona ethimbeni elallicija leli qembu ngesikhathi lidliwa yizembe kumasizini amabili edlule.
Njengoba uHunt noMiddendorp bezosebenza ndawonye okokuqala, ukufika kukaFernandez kubonisa inhloso eqinile yokwakha ithimba lingangilokothe.
Leli thimba elisha labaqeqeshi leDurban City ligabe ngamava amakhulu ebholeni laseNingizimu Afrika.
Kodwa, njengoba isisho esidala sikuveza, izinkunzi ezimbili azikwazi ukubusa esibayeni esisodwa.
Ngakho kuzothatha amehlo ukubona ukuthi uHunt noMiddendorp bazosebenzisana kanjani.
Futhi abalandeli bazobe bemagange ukubona ukuthi laba abathathu bangayiletha yini impumelelo ngesizini ezayo.
Okunye okuqaphelekayo wuukuthi ebholeni lakuleli, uma kuqashwa umqondisi wezokuqeqesha, usuke ezogada umqeqeshi.
Kuvamise ukuthi kungapheli sikhathi esitheni bese umqeqeshi eyaxoshwa, kungene lo obengumqondisi endaweni yakhe.
