ILeopards isiphinde yavuka ‘ngesibabuli’ eKZN
- Sibongiseni GUMBI
IBlack Leopards, esizivundulele inqwaba yabadlali kwaZulu-Natal phambilini, seyiphinde ‘yazisikela kwelinonile’ kwelikaMthaniya.
ILisenethini icoshe umoya wokuthi umdlali obesuke eKZN eyodlala eqenjini le-ABC Motsepe League eLimpopo, usefike wachaza abeLeopards.
UKhanyisani “Sishebo” Mthembu, oneminyaka engu-? Usesayine kwiLeopards kanti kuvela ukuthi uzoqala imidlalo uma kubuywa ekhefini leFifa.
Kuthiwa ubekhona ebhentshini emdlalweni odlule, la iLidoda Duvha ibambane khona ngo 1-1 neHungry Lions.
USisebho, odabuka eDonnybrook, eningizimu yeKZN, ubedlala esigabeni sama-amesha kwi-Ixopo United ngesizini edlule.
Ube esevundululwa ngabeTM Scouts kaTebogo Moloi, ababe sebemvulela amasango okuthi agcine efike esigabeni esikhokhelayo.
Ulandela ezinyathelweni zoSiphelele Ntshangase noSibongiseni “Ox” Mthethwa abaqala ibhola elikhokhelayo kuleli qembu laseLimpopo.
Nabo babephume kuso isandla sikaMoloi. Ethintwa ngalo mdlali uMoloi, uthe akafuni ukukhuluma kakhulu, ufuna kube nguyena omkhulumela ngomsebenzi enkundleni.
