IKaizer Chiefs ‘imshaya ngomzimba’ ophelelwa yinkontileka
Ikusasa lomunye wabadlali basesiswini kwiKaizer Chiefs alicacile njengoba lo mdlali esesalelwe yizinyanga ezimbalwa ngaphambi kokuphela kwenkontileka.
KUvela ukuthi leli qembu alikayithi vu eyokuvuselelwa kwenkontileka yalo mdlali futhi izimpawu azizinhle.
Imibiko yakamuva iveza ukuthi iKaizer Chiefs isazothatha isinqumo ngokuthi iyamgcina yini uGeorge Matlou noma izomdedela ayozama elinye iqembu.
Lo mdlali oneminyaka engu-27 ubudala welulelwe inkontileka yakhe ngonyaka owodwa ngaphambi kokuqala kwale sizini.
Inkontileka yakhe yokuqala beyiphela ngoJuni 2025, okwenza ukuthi manje iphele ngoJuni kulo nyaka.
Manje kuvela ukuthi leli qembu alikakamthinti lo mdlali ngokuthi kukhulunywe eyenkontileka entsha yize sekusele izinyanga ezinhlanu iphele.
UMatlou ujoyine Amakhosi ngoJulayi 2022 engumdlali otholakala mahhala ngemuva kokushiya iMoroka Swallows engasekho.
Ufike kubhekwe lukhulu kuye ngemuva kokudlala kahle kwiSwallows la ayengomunye wabadlali abadlala njalo.
Nokho isikhathi sakhe kwiChiefs siphazanyiswe wukulimala, okunciphise amathuba akhe okuzibonakalisa nokuqinisa indawo yakhe eqenjini.
ISoccer Laduma ibika ukuthi ikilabhu iyasicubungula isimo sakhe ngaphakathi futhi kusabuyekezwa umthelela wakhe.
FUNDA NALA | OweTshakhuma akakhalanga kakhulu behlulwa yiPirates
Lokhu kuyingxenye yohlelo lweKaizer Chiefs lokulungiselela isizini elandelayo.
Njengoba inkontileka yakhe isizophela futhi kungakathathwa sinqumo ngaye, izinyanga ezizayo zicacise ukuthi uMatlou uyahlala eNaturaenna noma uyofuna isiqalo esisha.
