IChiefs iqinisekisa izinhlelo zohambo lwaseNetherlands
IKaizer Chiefs isiqinisekise izinhlelo zayo zohambo lwaNetherlands la iyolungiselela khona isizini entsha.
Iqembu lizozinza edolobheni elibizwa nge-Apeldoorn kusukela ngoJulayi 4 kuya kuJulayi 19 July.
Leli dolobha lingamakhilomitha angu-80 ukusuka enhlokodolobha yaseNethwelanrs i-Amsterdam.
IKaizer Chiefs ihlele ukudlala imidlalo yobungani emihlanu namaqembu aphambili eDutch Eredivisie ne-Eerste Divisie.
Emine yale midlalo yeKaizer Chiefs izovuleleka kubalandeli ukuthi bangakwazi ukuzoyibuka, kanti owodwa uzobe ungenazihlwele.
Lume kanje uhlelo lwale midlalo iKaizer Chiefs ezozizwa amandla ngayo:
- Julayi 8, ngo-7 ebusuku – v Vitesse Arnhem | eSportpark Driel, eDriel (Uvulelekile kubalandeli)
- Julayi 11, ngo-4 ntambama– v FC Utrecht | eGarderen (Ngeke ube nabalandeli – usenkundleni yokujima)
- Julayi 12, ngo-2 ntambama – v NEC Nijmegen | e-Overasselt (Uvulelekile kubalandeli)
- Julayi 15, ngo-7 ebusuku – v PEC Zwolle | eMeppel (Uvulelekile kubalandeli)
- JUlayi 16, ngo-7 ebusuku – v FC Twente | eDelden (Uvulelekile kubaladeli)
IKaizer Chiefs iphinde yaveza ukuthi ixhaswe yiCarling Black Label kulolu hambo lwayo.
“Ukungena kweCarling Black Label kugcizelela ukuzinikela kwayo ekuthuthukiseni ibhola lakuleli, nokulekelela iChiefs ikhule ebholeni lomhlaba.
“Abalandeli beChiefs abaqokwe ngomncintiswano weVodacom iTsamaya Campaign bazohamba neqembu.
“Ikilabhu ibona lolu hambo lwase-Europe luyisinyathelo esibalulekile ekwakheni isisekelo sesizini ka-2025/26.
“Luzophinde luqinise ubudlelwano bebhola phakathi kweNingizimu Afrika neNetherlands,” kusho iChiefs esitatimendeni.
Ayizange ke nokho icacise ukuthi izohamba seyibethulile yini abadlali bayo abasha noma izobethula kbona phesheya.
Iveze ukuthi abezindaba bazovulelwa kwezinye izinsuku ukuba bazoxoxisana nabadlali nabaqeqeshi ngokuqhubeka kwekhempu yeqembu.
